इच्छाकामनामा पछि परेका रवि भन्छन्- अब लिड गर्ने पालो मेरो

काठमाडौं। जारी मतगणनामा एमाले उम्मेदवारभन्दा करिब ६ सय बढी मतले पछि परेका राष्ट्रिय स्वतन्त्र पार्टीका सभापति रवि लामिछानेले हालसम्म आइरहेको नतिजाबाट सन्तुष्ट रहेको बताएका छन्।

नवगठित स्वतन्त्र पार्टीले देशका विभिन्न ठाउँमा उत्साहजनक उपस्थिति देखाउँदा पार्टीका राष्ट्रिय सभापति रविले भने मतगणनाको सुरुआतदेखि अग्रता लिन नसके पनि पछि जित्ने दाबी गरेका छन्।

चितवन क्षेत्र नम्बर २ जारी गणनामा उनी एमालेका कृष्णभक्त पोखरेलभन्दा पछि छन्। १०४०५ मत गणना हुँदा ३६२३ मतका साथ पोखरेल अघि छन्। कांग्रेसका उमेश श्रेष्ठले ३२१६ मत प्राप्त गरेका छन्। लामिछानेले २९७८ मत ल्याएका छन्।

मतगणना स्थल औद्योगिक प्रदर्शनी केन्द्रमा संचारकर्मीलाई प्रतिक्रिया दिँदै लामिछानेले इच्छाकामनामा एमालेसँग ठूलो अन्तर हुने अनुमान गरेको दाबी गरे। ‘ईच्छाकामनामा हामीले सोचेभन्दा धेरै भोट आयो, अन्तर सोचेभन्दा कम छ। अब शहरका भोट गन्दा मैले जित्छु’’ उनले प्रतिक्रिया दिए। चितवन–२ को इच्छाकामना गाउँपालिकाको मतगणना सकिएको छ।

अहिले कालिका नगरपालिकाको गणना सुरू भएको छ। लामिछानेले कालिका नगरपालिकाका सबै वडाहरूमा आफूलाई उल्लेख्य मत आउने दाबी गरेका छन्।

इच्छाकामानामा एमालेले आफ्नो मत जोगाए जसरी कालिका र भतपुरमा जोगाउन नसकेको अनुमान छ। तर मतगणना नहुँदासम्म यसै भन्न नसकिने कतिपयको आंकलन छ। सत्तारुढ गठबन्धनले पनि अहिलेसम्म राम्रै मत ल्याएको हुँदा लामिछानेको अवस्था के हुन्छ कालिका नगरपालिकाको गणना सुरु भएपछि बल्ल प्रस्ट हुने बताइन्छ।