अन्तरिक्षबाट फर्किएकी सुनीताको पहिलो पत्रकार सम्मेलन, के-के भनिन् ?

काठमाडौं । अन्तरिक्षबाट फर्केपछि नासाका अन्तरिक्ष यात्री सुनीता विलियम्स र बुच विल्मोरले पत्रकार सम्मेलन गरेका छन् ।

पत्रकार सम्मेलनमा सुनीताले अन्तरिक्षबाट पृथ्वीमा आफ्नो पुनरागमन र भारतको बारेमा पनि बताएकी छन् ।

उनले भनिन्, “हाम्रो शरीरले परिवर्तनसँग कसरी अनुकूलन गर्छ भन्ने कुरा साँच्चै चमत्कार हो। जब म पहिलो दिन फर्किएँ, हामी सबै केही डगमगाएका थियौं। हाम्रो स्नायु प्रणालीले २४ घण्टामा कसरी काम गर्न थाल्छ भन्ने कुरा साँच्चै अचम्मको छ। हाम्रो मस्तिष्कले के भइरहेको छ भनेर बुझ्छ।”

सुनीतालाई भारतको बारेमा पनि प्रश्न सोधिएको थियो। जसको जवाफमा उनले भनिन्, “भारत एउटा अद्भुत देश हो। हामी हिमालय पार गर्दा हरेक पटक बुच विलमोरले आफ्नो क्यामेरामा केही सुन्दर दृश्यहरू कैद गर्थे।”

अन्तर्राष्ट्रिय अन्तरिक्ष स्टेशन गएकी भारतीय मूलकी नासाकी अन्तरिक्ष यात्री सुनीता २८६ दिनपछि मार्च १९ मा पृथ्वीमा फर्किएकी थिइन् ।

अन्तरिक्ष स्टेशनमा २८६ दिन बिताउँदा सुनीता र बुचले ९०० घण्टा अनुसन्धान गरे र यस अवधिमा उनीहरूले १५० वैज्ञानिक प्रयोगहरू गरेका थिए ।

भारतीय मूलका दुई महिलाको अन्तरिक्षयात्रा : सुनीता फर्किइन्, तर कल्पना सकिनन्