विश्व चर्चित ब्यान्ड ‘वन डाइरेक्सन’ का स्टार लियाम पेनको बालकोनीबाट खसेर मृत्यु

ब्युनस आयर्स । पूर्व वन डाइरेक्सन स्टार लियाम पेनको अर्जेन्टिनाको ब्युनस आयर्समा रहेको एक होटलको बालकोनीबाट खसेर मृत्यु भएको छ ।

होटलको तेस्रो तलाबाट खसेर उनको ३१ वर्षको उमेरमा मृत्यु भएको प्रहरीले जनाएको छ । प्रहरीको विज्ञप्तिमा उल्लेख भएअनुसार पालेर्मो सहरमा ९११ नंमा कल आएसँगै आपतकालीन टोली त्यहाँ पुगेपछि पेनको शव फेला परेको थियो ।

पेन सन् २०१० मा एक्स फ्याक्टर टिभी शोमा ह्यारी स्टाइल्स, लुइस टोमलिन्सन, नायल होरान र जैन मलिकसँग सिर्जना गरिएको अत्यन्त लोकप्रिय ब्वाइब्यान्डको सदस्यका रूपमा विश्वव्यापी ख्याति कमाएका थिए ।

यस महिनाको सुरुमा पेनले आफ्ना पूर्व वन डाइरेक्सन ब्यान्डका साथी नायल होरानको अर्जेन्टिना कन्सर्टमा सहभागिता जनाएका थिए ।

ब्युनस आयर्सका प्रहरीका अनुसार घटनास्थलमा पुगेका प्रहरीले सुरुमा लागुपदार्थ र मदिराको प्रभावमा रहेको हुन सक्ने एक आक्रामक व्यक्तिको रिपोर्टको जवाफमा कारबाही गरिरहेका थिए ।

आपतकालीन चिकित्सा सेवाका निर्देशक अल्बर्टो क्रेसेन्टीले पेनले गम्भीर चोटपटक लागेर मृत्यु भएको बताए ।

मृत्युको खबर फैलिएपछि प्रशंसकहरू ब्युनस आयर्सको होटल बाहिर भेला हुन थालेका थिए, जसका कारण प्रहरीले प्रवेशद्वार बन्द गर्नुपरेको थियो ।

बेलायतको वुल्भरह्याम्प्टनमा जन्मिएका पेनले पहिलो पटक सन् २००८ मा आईटीभी प्रतिभा शो द एक्स फ्याक्टरमा भाग लिएर स्टारडम खोज्ने प्रयास गरेका थिए । तर, निर्णायक साइमन काउवेलले उनलाई दुई वर्षपछि फर्केर आउन भनेका थिए ।

उनी फर्किए, सन् २०१० मा निर्णायकहरूलाई बढी प्रभावित पारे, र बुट क्याम्प चरणमा अन्य चार एकल आशावादीहरूसँग मिलेर वन डाइरेक्सन जन्मियो ।

समूहले सन् २०१५ मा हायटसमा जाने घोषणा गर्नुअघि विश्वभरका चार्टहरूमा शीर्ष स्थान हासिल गर्दै बेलायतमा चारवटा नम्बर वन एल्बम र चारवटा नम्बर वन सिंगल प्राप्त गरेको थियो ।

सन् २०१७ मा, पेनको पहिलो एकल सिंगल स्ट्रिप द्याट डाउन अफिसियल युके चार्टमा तेस्रो स्थानमा रह्यो, र फिफ्टी सेड्स फ्रिड साउन्डट्र्याकको गीत फर यूमा रिटा ओरासँगको सहकार्यले पनि टप १० मा स्थान बनाएको थियो ।

उनले सन् २०१६ मा गर्ल्स अलाउड स्टार शेरिल कोलसँग सम्बन्ध सुरु गरे र अर्को वर्ष उनीहरूको एक छोरा बियर जन्मियो । जोडी सन् २०१८ मा छुट्टियो।

निधनको खबरसँगै श्रद्धाञ्जलीहरू आउन थालेका छन् ।