फलफूल नधोएर खाँदा हुनसक्छ यस्तो समस्या

काठमाडौं । बगैँचा वा पसलबाट फलफूल र तरकारीहरू किनेर ल्याएपछि तिनीहरूलाई राम्रोसँग धोएर प्रयोग गर्नुपर्छ भन्ने कुरा हामी सबैलाई थाहा छ । तर, यसलाई धुने सही तरिका थोरैलाई मात्र थाहा हुन्छ ।

खाद्य विशेषज्ञहरू भन्छन्, ‘खानु र पकाउनु अघि फलफूल र तरकारीहरूलाई सही तरिकाले धोएर तिनीहरूमा लागेको फोहोर सफा गर्न सकिन्छ र यसले धेरै रोगहरूको जोखिम कम गर्न सक्छ ।’

खेत–बारीबाट हाम्रो भान्सासम्म आइपुग्ने तरकारीहरू र फलफूलहरू लिस्टेरिया, ई.कोली, साल्मोनेला साथै हेपेटाइटिस ए र नोरोवायरस जस्ता विभिन्न रोगजन्यबाट दूषित हुन सक्ने स्वास्थ्य विशेषज्ञहरू बताउँछन् । यो हटाउनका लागि चिसो र सफा बग्ने पानीले धुनुहोस् । बग्ने पानीले यी रोगाणुहरूलाई सजिलै सफा गर्न सकिन्छ ।

यसरी धुनुहोस् फलफूल र तरकारीहरू

तरकारीहरू र फलफूलहरू धुनको लागि ठूलो भाँडो लिनुहोस् । यसमा पानी हालेर दुईदेखि पाँच मिनेटको लागि फलफूल र तरकारीहरूलाई छोड्नुहोस् ।

एक अनुसन्धानमा पाइएको छ कि धुनुअघि फलफूल र तरकारीहरूलाई भिजाएर राख्दा तिनीहरूमा ब्याक्टेरियाको सङ्ख्या धेरै कम हुन्छ । त्यसपछि खानुअघि पनि सफा पानीले राम्रोसँग सफा गर्नुहोस् ।