पूर्वपति पटेलविरुद्ध दलजीतको एफआईआर, एक्स्ट्रा वैवाहिक सम्बन्ध राखेको आरोप

काठमाडौं । भारतीय टीभी अभिनेत्री दलजीत कौरको वैवाहिक जीवन पछिल्लो केही दिनदेखि चर्चामा छ । अभिनेत्रीले गत वर्ष केन्याका व्यापारी निखिल पटेलसँग विवाह गरेकी थिइन् । तर, विवाह ८ महिनामै टुट्यो ।

अभिनेत्रीले पतिमाथि एक्स्ट्रा वैवाहिक सम्बन्ध राख्ने, घरबाट निकाल्ने जस्ता गम्भीर आरोप लगाएकी थिइन् । अब अभिनेत्रीले आफ्ना पति निखिल पटेलविरुद्ध मुम्बईको अग्रिपाडा पुलिस स्टेशनमा उजुरी दिएकी छन् ।

पटेलविरुद्ध आईपीसीको धारा ८५ र ३१६ (२) अन्तर्गत मुद्दा दर्ता गरिएको छ । उनीमाथि दलजीतलाई क्रूरता र विश्वासघात गरेको आरोप छ।

अभिनेत्रीले सामाजिक सञ्जालमा पोष्ट सेयर गर्दै प्रहरी चौकी प्रवेश गर्दा डराएको तर, सबैको सहयोगले अब आफूलाई न्याय हुनेमा विश्वस्त छिन् ।

अगस्ट १ मा निखिल पटेल आफ्नो अफवाह प्रेमिकासँग मुम्बई एयरपोर्टमा देखिएका थिए। निखिलको जन्मदिन २ अगस्टमा थियो, जुन उनले आफ्नी प्रेमिकासँग मुम्बईमा मनाए।

पूरै मामिला के हो ?

अभिनेत्री कौरले मार्च २०२३ मा केन्याका व्यापारी निखिल पटेलसँग विवाह गरेकी थिइन् । विवाहपछि उनी छोरा जोर्डनसँग केन्या गएकी थिइन् । जोर्डन कौरको  पहिलो श्रीमान् शालिन भानोटतर्फका छोरा हुन् । भानोट र कौरको विवाह सन् २०१५ मा टुङ्गिएको थियो ।

केन्या गएको ८ महिनापछि दलजीत छोरासहित भारत फर्किइन् । भारत आएपछि उनले सामाजिक सञ्जालमार्फत् सम्बन्धविच्छेदको संकेत दिएकी थिइन्, त्यसपछि विभिन्न अन्तर्वार्ता र सामाजिक सञ्जाल पोस्टमार्फत उनको र निखिलबीच विवाद जारी रह्यो ।

निखिलले एक अन्तर्वार्तामा दलजीत केन्यामा एडजस्ट हुन नसकेको पनि बताए । उनले भारतलाई धेरै मिस गरिरहेकी थिइन् । छोराको स्कुल उद्धृत गर्दै उनले भारत फर्कने कुरा गरिन् र भोलिपल्टै सामान प्याक गरेर भारत आइन् । निखिलका अनुसार दलजीत भारत फर्किएपछि उनीहरुको सम्बन्ध टुटेको थियो ।

कौरले सामाजिक सञ्जाल पोस्टमार्फत् आफ्ना श्रीमानले आफूलाई धोका दिएको बताएकी छन् । उनको एक्स्ट्रा वैवाहिक सम्बन्ध रहेको आरोप छ । तर, सामाजिक सञ्जालमा निखिलमाथि खुलेर आरोप लगाउनु अभिनेत्रीका लागि महँगो साबित भयो ।

निखिलले अभिनेत्रीलाई कानुनी नोटिस पठाएर अब आफ्नो छवि बिगार्ने प्रयास गरेमा कडा कारबाही गर्ने चेतावनी दिएका थिए । घरबाट सामान लैजान नत्र सबै सामान दान गर्ने पनि उनले बताएका थिए ।