जेठमा मात्रै सरकारले लियो ४३ अर्ब रुपैयाँ ऋण, देशको कुल ऋण २४ खर्ब नाघ्यो

काठमाडौं । सरकारले जेठ महिनामा मात्रै करिब ४३ अर्ब रुपैयाँ सार्वजनिक ऋण लिएको छ । सरकारले अघिल्लो एक महिनामा ३४ अर्ब रुपैयाँ आन्तरिक ऋण र करिब ९ अर्ब रुपैयाँ बाह्य ऋण उठाएको हो ।

यो सँगै सरकारले चालु आर्थिक वर्षको ११ महिनामा कुल तीन खर्ब ७ अर्ब ६७ करोड रुपैयाँ सार्वजनिक ऋण लिएको छ ।

सार्वजनिक ऋण व्यवस्थापन कार्यालयका अनुसार चालु आवमा प्राप्त कुल ऋणमध्ये अधिकांश आन्तरिक ऋणकै हिस्सा रहेको छ । कार्यालयका अनुसार जेठसम्म सरकारले दुई खर्ब २५ अर्ब रुपियाँ आन्तरिक ऋण लिएको छ भने ८२ अर्ब ६७ करोड रुपियाँ बाह्य ऋण लिएको छ ।

चालु आवमा सरकारले कुल चार खर्ब ५२ अर्ब ७५ करोड रुपियाँ सार्वजनिक ऋण लिने लक्ष्य राखेको थियो ।

कुल लक्ष्यमध्ये जेठसम्ममा सरकारले करिब ६८ प्रतिशत ऋण लिएको कार्यालयले जनाएको छ ।

जेठसम्म आन्तरिक ऋणबापत दुई खर्ब २७ अर्ब १९ करोड रुपैयाँ साँवा र ब्याज भुक्तान गरेको छ ।

जसमध्ये एक खर्ब ६१ अर्ब ६२ करोड रुपैयाँ साँवा र ६५ अर्ब ५७ करोड रुपैयाँ ब्याज भुक्तान भएको हो । त्यस्तै बाह्य ऋण लिएबापत सरकारले ४३ अर्ब ९९ करोड रुपैयाँ साँवा र ब्याज भुक्तान भएको कार्यालयले जनाएको छ । जसमध्ये ३५ अर्ब ७० करोड रुपैयाँ साँवा र आठ अर्ब २९ करोड रुपियाँ ब्याज भुक्तान भएको छ ।

खर्च स्रोतका रूपमा राजस्वले अपुग हुन थालेपछि सरकारले ऋण लिने क्रम पछिल्ला वर्षमा बढ्दै गएको छ । अहिलेसम्म सरकारले तिर्नुपर्ने सार्वजनिक ऋणको दायित्व २४ खर्ब रुपियाँ नाघिसकेको छ ।

देशको कुल ऋणलाई भाग लगाउदा एक नेपालीको भागमा ८० हजार रुपैयाँ पर्न आउछ । यस हिसाबले हेर्दा हरेक नेपाली जन्मिदै ८० हजार ऋण लिएर आउनु परेको छ ।

जसमध्ये आन्तरिक ऋणको दायित्व ११ खर्ब ९२ अर्ब र बाह्य ऋणको दायित्व १२ खर्ब १७ अर्ब रुपियाँ रहेको छ ।