ललितपुर मेयर्स कप : एपीएफको लगातार चौथो जित

काठमाडौं। ललितपुर मेयर्स कप टी–२० क्रिकेट प्रतियोगितामा सुदूरपश्चिम प्रदेशलाई पराजित गर्दै एपीएफ क्लबले लगातार चौथो जित निकालेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहीबार भएको खेलमा एपीएफले सुदूरपश्चिमलाई ३ विकेटले पराजित गरेको हो ।

११२ रनको लक्ष्य एपीएफले १९.४ ओभरमा ७ विकेटको क्षतिमा पूरा गर्यो ।

एपीएफका लागि ममता चौधरी ३२ रनमा अविजित रहिन् । रोमा थापाले भने २३ रन बनाइन् । सुदूरपश्चिमका लागि लक्ष्मी साउदले २ विकेट लिइन् ।

पहिले ब्याटिङ गरेको सुदूरपश्चिमले पूरै ओभर खेलेर ५ विकेटको क्षतिमा १११ रन बनाएको थियो । विन्दु रावलले ३६ तथा रुबी पोदार २९ रन बनाइन् । कविता जोशी भने २९ रनमा अविजित रहिन् ।

एपीएफका लागि रेखा रावल र इन्दु बर्मा १–१ विकेट लिए ।

एपीएफले यसअघि नै फाइनलमा स्थान पक्का गरिसकेको छ ।