नेदरल्याण्ड्सले नामिबियालाई हरायो, माइकल लेविटको अर्धशतक

काठमाडौं। आईसीसी पुरुष क्रिकेट विश्व कप लिग–२ मा नेदरल्याण्ड्सले नामिबियालाई पराजित गरेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा सोमबार भएको खेलमा नेदरल्याण्ड्सले नामिबियालाई ७ विकेटले पराजित गरेको हो।

जारी लिग–२ मा नेदरल्याण्ड्सको यो पहिलो जित हो। आफ्नो पहिलो खेलमा नेदरल्याण्ड्स नेपालसँग पराजित भएको थियो। यससँगै २ अंक भएको नेपाल अंक तालिकाको शीर्ष स्थानमा उक्लिएको छ। नामिबिया दोस्रो स्थानमा झरेको छ। २ अंकसहित नेदरल्याण्ड्स तेस्रो स्थानमा छ।

१२४ रनको लक्ष्य नेदरल्याण्ड्ले २७.२ ओभरमा ३ विकेटको क्षतिमा पूरा गरेको हो। नेदरल्याण्ड्सका लागि माइकल लेविटले अर्धशतकीय पारी खेले। उनले ८१ बलमा ८ चौका र २ छक्का प्रहार गर्दै ५७ रन बनाए। म्याक्स ओ’डाउडले भने २८ रन बनाए। नामिबियाका लागि गेहार्ड ह्रास्मसले ३ विकेट लिए।

पहिले ब्याटिङ गरेको नामिबिया ३५.१ ओभरमा १२३ रनमा अलआउट भएको हो। नामिबियाका लागि जेजे स्मितले २६ र रुबेन ट्रम्पेलम्यानले २० रन बनाए। नेदरल्याण्ड्सका लागि आर्यन दत्तले ६ विकेट लिए। काइल क्लेनले २ तथा रोयलोफ भान डे मेरवी र म्याक्स ओ’डाउडले १–१ विकेट लिए।

अब बुधबार नेपाल र नामिबियाबीच प्रतिस्पर्धा हुनेछ।