विश्वकप क्रिकेट : दक्षिण अफ्रिकाले न्यूजिल्यान्डलाई दियो ३५८ रनको लक्ष्य

काठमाडौं। एकदिवसीय विश्वकप क्रिकेटमा दक्षिण अफ्रिकाले न्यूजिल्यान्डलाई ३५८ रनको लक्ष्य दिएको छ।

भारतको पुनेमा जारी खेलमा पहिले ब्याटिङ गरेको दक्षिण अफ्रिकाले पुरै ओभर खेलेर ४ विकेटको क्षतिमा ३५७ रन बनाएको हो। दक्षिण अफ्रिकाको लागि रसी भान देर डुसेन र क्विन्टन डे ककले शतकीय पारी खेले।

रसीले ११८ बलमा १३३ रन बनाए। क्विन्टनले भने ११६ बलमा ११४ रन बनाए।न्यूजिल्यान्डको लागि टिम साउथीले २ तथा ट्रेन्ट बोल्ट र जेम्स निशमले १–१ विकेट लिए।

जारी विश्वकपमा भने क्विन्टनको यो चौथो शतक हो। क्विन्टन एकै विश्वकपमा ४ शतक प्रहार गर्ने तेस्रो तथा दक्षिण अफ्रिकाको पहिलो खेलाडी हुन्। एकै विश्वकपमा सर्वाधिक शतक हान्ने कीर्तिमान रोहित शर्माको नाममा छ।

सन् २०१९ को विश्वकपमा रोहितले ५ शतक प्रहार गरेका थिए। सन् २०१५ को विश्वकपमा श्रीलंकाका कुमार संगाकाराले ४ शतक प्रहार गरेका थिए।