नेपालसँग खेल्ने भारतीय टोली निकै बलियो, सबैजसो खेलाडी ‘स्टार’

काठमाडौं। १९औँ एसियाली खेलकुद अन्तरगत क्रिकेटको पहिलो क्वार्टरफाइनलमा नेपाल र भारतबीच प्रतिस्पर्धा हुने पक्का भएको छ।

चीनको हान्जाउमा सोमबार भएको लक्की ड्रमार्फत नेपालले प्रतिद्वन्द्वीको रूपमा भारतलाई पाएको हो। नेपाल र भारत मंगलबार बिहान पौने ७ बजे आमने-सामने हुनेछन्।

अन्तर्राष्ट्रिय टी–२० मा पहिलोपटक नेपाल र भारत आमने-सामने हुँदैछन्। विश्वकपको कारण भारतले आफ्नो दोस्रो रोजाइको टोली पठाएको छ।

तर भारतले दोस्रो रोजाईको भनेर पठाएको टोली स्टार खेलाडीले भरिएको छ । भारतीय टिममा रहेका सबै खेलाडीले इन्डियन प्रिमियर लिग आईपीएल खेलिरहेका छन् भने धेरै खेलाडीले राष्ट्रिय टोलीमा स्थान पाएका छन् ।

यस्तो छ भारतीय टोली-

ऋतुराज गायकवाड (कप्तान), यशस्वी जैसवाल, राहुल त्रिपाठी, तिलक बर्मा, रिंकु सिंह, जितेश शर्मा, वासिन्टन सुन्दर, शाहवाज अहमद, रवि विश्रोई, आवेश खान, अर्शदीप सिंह, मुकेश कुमार, शिभम माभी, शिवम दुबे र प्रभशिम्रन सिंह ।

वैकल्पिक खेलाडी – यश ठाकुर, साई किशोर, वेंकटेश ऐर, दीपक हुडा र साई सुदर्शन ।

भारतबाट लगातार  राष्ट्रिय टोलीमा खेल्दै आएका डेथ ओभर स्पेलिष्ट अर्शदीप सिंह टोलीमा छन् । उनले ३३ टि-२० अन्तर्राष्ट्रियमा ५० विकेट लिएका छन् । भारतीय ब्याटिङका भविष्य मानिएका रिंकु सिंह, युवा ओपनर यशस्वी जैसवाल, राहुल त्रिपाठी, तिलक बर्मा, जितेश शर्मा र शिवम् दुबे पनि टोलीमा छन् ।

धेरैले भोलि नेपालले भारतलाई हराउन सकेमा ठूलो उपलब्धि हुने  बताएका छन् । किनकी भारतले एसियाली खेलकुदमा पठाएको टोली राष्ट्रिय टोली भन्दा कम छैन ।

भारतलाई पराजित गर्न सके नेपालले सेमिफाइनलमा स्थान पक्का गर्नेछ। नेपालले माल्दिभ्स र मंगोलियालाई हराउँदै अन्तिम ८ मा स्थान बनाएको थियो ।