जो क्यान्सर जिताउन गीत गाउँथिन्, आज आफैँ क्यान्सर पीडित बनिन् (भिडिओ)

काठमाडौं। जमुना थापा गायिका हुन्। तीन दशअघि २०५० पछि गायन क्षेत्रमा लागेकी उनले थुप्रै स्टेजमा गीत गाइसकेकी छिन्।

यो अवधिमा उनले आर्थिक अभावमा उपचार गर्न नसकेका धेरैलाई उनले स्टेज कार्यक्रम गरेर सहयोग उठाइन्। तीन दशक लामो साङ्गीतिक जीवनमा उनले कैयौँ पटक क्यान्सर पीडितको सहयोगार्थ समेत कन्सर्टमा गीत गाइन्।

क्यान्सरपीडितका लागि उपचार र सहयोग रकम जुटाउने कार्यक्रममा उनले बिना पारिश्रमिक सहयोग गर्थिन्।

शिक्षिका समेत रहेकी जमुना साङ्गीतिक जीवन मानवसेवाका लागि अर्पण गर्दैआएकी थिइन्। उनले गरेको कतिपय साङ्गीतिक कार्यक्रमले पीडितको उपचारमा सहयोग पुगेको थियो।

उनै गायिका जमुनालाई आज क्यान्सरले भेटेको छ। विगतमा क्यान्सर पीडितको उपचारको लागि गीत गायक उपचार रकम संकलन गर्दै हिँड्ने उनै जमुनाको अजा उपचार गर्न पैसा छैन। काठमाडौँ स्थायी बसोबास गर्दै आइरहेकी जमुना छ महिनायता पाठेघरको क्यान्सरको कारण थलिएकी छिन्। स्थायी घर झापा भएकी जमुना अहिले गौरीघाटमा बस्छिन्।

भिडिओ –

उनी क्यान्सरको तेस्रो चरणसँग लडिरहेकी छिन्। चारपल्ट किमो गराइसकेकी उनको केही चरणको किमो थेरापी बाँकी छ। तर, अहिले आर्थिक अभावका कारण उपचार गर्न नसकेको उनी बताउँछिन्।

भक्तपुर क्यान्सर अस्पतालबाट किमो लिँदै आइरहेकी जमुनाको पैसा अभावका कारण अहिले किमो रोकिएको सुनाइन्।

उनलाई सहयोग गर्ने न उनका माइतीनै छन् न कुनै नातेदारनै। उनको श्रीमानको पनि लिभर फेल भएर केही बर्षअघिनै मृत्यु भइसकेको छ।

उनको घरको खर्च टार्ने धौ धौ परिरहेको छ। पैसा अभावकै कारण छोरीको ब्याचलर पढाई पनि अगाडी बढाउन नसकेको उनले पीडा सुनाइन्।

उनी भन्छिन्, ‘‘आफूले पढाउने स्कुलका शिक्षकबाट चन्दा संकलन गरेर चार पटक किमो गराइसकेको छु। ऋण पनि तिर्न बाँकी छ। बाँकी उपचार पनि अघि बढाउनुपर्ने छ।’’

उनले सर्वसाधारणसमक्ष सहयोगको याचना गरेकी छिन्। घरमा कमाउने उनी एक्ली हुन्। सात महिनादेखि काम गर्न नसक्ने भएपछि उनको अहिले आम्दानीको स्रोत नै बन्द भएको छ।

आफू बसेको घरको भाडासमेत तिर्न उनी अहिले असमर्थ छिन्। गहभरी आँसु झार्दै उनी भन्छिन्, ‘‘म बाँच्न चाहन्छु, मलाई बचाउनुहोस् । तपाईँको एउटा सहयोगले मैले नयाँ जीवन पाउँछु।’’

जमुनालाई उनका पुराना साथी गायक यम बराललगायतले केही सहयोग गरेका छन्। तीन दशक अघि साङ्गीतिक क्षेत्रमा संघर्षगर्दा यम बराल, राजेश पायल राई, रामकृष्ण ढकाल, जमुना थापालगायत कलाकार सँगै हुन्थे।

आफ्ना पुरानो संर्घषको साथीलाई परेको पीडामा मलहम लगाउन सकेको सहयोग गर्न भन्दै अरू कलाकारले समेत आग्रह गरेका छन्।

क्यान्सर पीडित जमुनाले आफूलाई सहयोग गर्न चाहनेले फोन नम्बर वा प्रत्यक्ष खाता नम्बरमा पैसा पठाउन उनको अनुरोध गरेकी छिन्।

जमुना कुमारी थापा – Mobile No : 9803035230

Account No : 01905080213264 (Nepal Investment Mega Bank), Baneshwor

Jamuna Kumari Thapa