काठमाडौं। सरकारले चालु आर्थिक वर्षको पहिलो दुई महिनामा ४९ अर्ब २३ करोड ऋण थपेको छ । नयाँ आर्थिक वर्षको पहिलो दुई महिना अर्थात् साउन र भदौमा ४९ अर्ब २३ करोड ऋण थपिएको हो । योसँगै नेपालको सार्वजनिक ऋण २३ खर्ब भन्दामाथि पुगेको छ ।
दुई महिनाको अवधिमा सरकारले आन्तरिक ऋणको साँवा ब्याजतर्फ ४१ अर्ब ६१ करोड २२ लाख रुपैयाँ भुक्तानी दिएको छ । जसमा साउन महिनामा २५ अर्ब ८४ करोड ६९ लाख रुपैयाँ र भदौमा १५ अर्ब ७५ करोड ५३ लाख रुपैयाँ भुक्तानी दिएको सार्वजनिक ऋण व्यवस्थापन कार्यालयको तथ्याङ्कले देखाएको छ ।
सरकारले चालु आर्थिक वर्षको साउन र भदौमा आन्तरिक ऋणको साँवातर्फ कुल ३२ अर्ब ८३ करोड र ब्याजतर्फ ८ अर्ब ७८ करोड रुपैयाँ भुक्तानी गरेको छ ।
त्यस्तै, आन्तरिक ऋणको ब्याजबापत साउनमा ३ अर्ब ७७ करोड र भदौमा ५ अर्ब रुपैयाँ भुक्तानी गरेको छ ।
साउन र भदौ महिनामा सरकारले उठाएको आन्तरिक ऋणको दायित्व ११ खर्ब २६ करोड रुपैयाँ रहेको छ। जसमा साउनमा १३ अर्ब ६ करोड रुपैयाँ उठेको छ भने भदौमा ३१ अर्ब ३० करोड उठेको छ ।
यस्तै, सरकारले ८ अर्ब १७ करोड रुपैयाँ बराबरको वैदेसिक ऋणको साँवा ब्याज भुक्तानी गरेको छ । जसमा साउनमा १ अर्ब ९० करोड र भदौमा ६ अर्ब २६ करोड रहेको छ ।
बाह्य ऋणतर्फ सरकारले साउनमा करिब २ अर्ब ७२ करोड र भदौमा २ अर्ब २५ करोड ४९ लाख गरी कुल ४ अर्ब ९७ करोड रुपैयाँ बराबर शोधभर्ना लिएको छ । साउन र भदौमा ४९ अर्ब २३ करोड ऋण थपिएसँगै नेपालको जनसङ्ख्या २ करोड ९१ लाख ६४ हजार ५७८ प्रतिव्यक्तिका टाउकोमा ७९ हजार २०१ रुपैयाँ पर्न जान्छ ।
Facebook Comment
Comment