महिला खेलाडीलाई चुम्बन गरेको विवादमा स्पेन फुटबलका अध्यक्षले दिए राजीनामा

एजेन्सी । महिला खेलाडीलाई चुम्बन गरेपछि विवादमा तानिएका स्पेनी फुटबल महासंघका अध्यक्ष लुइस रुबियालेसले राजीनामा दिएका छन् ।

अघिल्लो महिना सकिएको महिला विश्वकपको फाइनलमा इंग्लयाण्डलाई हराएर च्याम्पियन बनेपछि स्पेनकी फरवार्ड जेनी हर्मोसोलाई चुम्बन गरेको भन्दै आलोचना भएपछि स्पेनिस फुटबल महासंघका अध्यक्ष रुबियालेसले राजीनामा दिएका हुन् ।

३३ वर्षीया हर्मोसोले चुम्बन सहमतिमा नभएको भन्दै गत मंगलबार कानुनी उजुरी पनि दिएको बताइन् । रुबियालेसले महासंघका कार्यवाहक अध्यक्ष पेड्रो रोचालाई एक विज्ञप्ति जारी गर्दै आफ्नो राजीनामा बुझाएको बताएका खबरमा उल्लेख छ ।

“म मेरो काम जारी राख्न सक्दिन,” उनले पियर्स मोर्गनलाई आफ्नो टेलिभिजन कार्यक्रममा भनेका छन्।

चुम्बन प्रकरणले हालैका हप्ताहरूमा स्पेनी फुटबललाई घेरेको छ र स्पेनको विश्वकप जितलाई छाया पारेको छ । फुटबलको विश्व प्रशासक निकाय फिफाले पनि उनलाई अस्थायी रूपमा निलम्बन गरेको थियो।

तर रुबियालेसले चुम्बन आपसीमा  सहमति भएको दाबी गरेका छन्।

“मेरो छोरीहरू, मेरो परिवार र मलाई माया गर्ने मानिसहरूले अत्याधिक उत्पीडनको प्रभाव साथै धेरै झूटहरू सहेका छन्, तर यो पनि सत्य हो कि सडकमा, दिनहुँ अधिक र सत्यको विजय भइरहेको छ।” उनले भनेका छन् ।