रातभर देशका सबैजसो ठाउँमा ठूलो वर्षा, आज केही ठाउँमा अति भारीसहित देशभर पानी पर्ने

काठमाडौं । मनसुन सक्रिय भएका कारण गएराति देशका सबैजसो ठाउँमा ठूलो वर्षा भएको छ ।

जल तथा मौसम विज्ञान विभागका अनुसार पूर्वदेखि पश्चिमसम्म र हिमालीदेखि तराईका जिल्ला सबैतिर गएराति पानी परेको छ ।

पछिल्लो १२ घण्टामा सबैभन्दा धेरै लमजुङको खुदीबजारमा १ सय २३ मिलिमिटर र सिन्धुलीको मरिणमा १ सय २० मिलिमिटर वर्षा भएको छ ।  यस्तै, नेपालगञ्ज विमानस्थलमा ७० मिलिमिटर वर्षा भएको छ भने बाँकेकै कुशुममा ५०,  गोरखाको बारपाकमा ७३ र दाङको शुक्रबारेमा ४३ मिलिमिटर वर्षा मापन भएको छ ।

कस्तो हुनेछ आजको मौसम ?

मौसम पूर्वानुमान महाशाखाका अनुसार मनसुनको न्यून चापीय रेखा  सरदर स्थान भन्दा उत्तरतिर (नेपाल नजिक) अवस्थित रहेको छ। यसका साथै भारतको उत्तर पूर्वी उत्तर-प्रदेश तथा उत्तर पश्चिम बिहार आसपासमा रहेको न्यून चापीय प्रणाली को पनि प्रभाव रहेको छ।

हाल देशभर सामान्य देखि पुर्ण बदली रहेको छ ।कोशी, बागमती, गण्डकी, लुम्बिनी  प्रदेशका केही र बाँकी प्रदेशका एक- दुई स्थानमा हल्का देखि मध्यम वर्षा भइरहेको छ ।

दिउँसो  देशभर पूर्ण बदली रहनेछ। देशका अधिकांश स्थानहरुमा हल्का देखि मध्यम वर्षाको सम्भावना रहेको छ। कोशी, बागमती, गण्डकी, लुम्बिनी, कर्णाली र सुदूरपश्चिम  प्रदेशका थोरै साथै  मधेश प्रदेशको एक-दुई स्थानहरुमा मेघ गर्जन/चट्याङ्ग सहित भारी देखि धेरै भारी वर्षाको समेत सम्भावना रहेको छ।

 राति देशभर सामान्य देखि पूर्ण बदली रहनेछ।  देशका अधिकांश स्थानहरूमा हल्का देखि मध्यम वर्षाको सम्भावना रहेको छ।

कर्णाली र सुदूरपश्चिम प्रदेशका केही तथा कोशी, बागमती, गण्डकी र लुम्बिनी प्रदेशका थोरै स्थानहरुमा मेघ गर्जन/चट्याङ्ग सहित भारी देखि धेरै भारी वर्षा को समेत सम्भावना रहेको छ।

सुदूरपश्चिम प्रदेशको एक-दुई स्थानमा अति भारी बर्षाको समेत सम्भावना रहेको छ।