संसद् भवनबाहिरै रास्वपाको ‘संसद् अभ्यास’, सरकारको नियतमाथि शंका

काठमाडौं । संसदको चौथो ठूलो दल राष्ट्रिय स्वतन्त्र पार्टी (रास्वपा)ले संसद् भवनबाहिरै संसद्को अभ्यास गरेको छ ।

प्रमुख प्रतिपक्ष दल नेकपा एमालेले सुन तस्करी प्रकरणलाई लिएर सदन अवरोध गरेपछि रास्वपाले संसद भवनअगाडि पार्टीका सांसदहरु भेला भइ ब्याङ्ग्यस्वरुप प्रतिकात्मकरुपमा संसद्को अभ्यास प्रस्तुत गरेको हो ।

संसदभित्र  बोल्न नपाएपछि विरोधस्वरुप बाहिर बोल्न परेको भन्दै रास्वपा सभापति रवि लामिछानेले सुन तस्करीबारे उपप्रधान एवं गृहमन्त्री नारायणकाजी श्रेष्ठले मंगलबार संसद्मा दिएको जवाफ चित्तबुझ्दो नभएको पनि बताए ।

उनले राजस्व अनुसन्धान विभागले गरिरहेको अनुसन्धान सिआईबीलाई दिनुले सरकारको नियतमाथि झन् शंका भएको बताए । उनले सुन तस्करी प्रकरणमा विभिन्न ठूला व्यक्ति र निकायहरुको संलग्नता रहेको दाबीसमेत गरे ।

सुन विमानस्थलबाट पास हुनुले सुरक्षा निकाय र भन्सार विभागको मिलेमतो छैन भनेर सन्तुष्ट हुन नसकिने उनको भनाइ छ ।

उनले भन्सार विभागका केही कर्मचारी मात्रै हटाएर अनुसन्धान गर्दा अनुसन्धान न्यायपूर्ण हुननसक्ने पनि बताए । सुन तस्करी प्रकरणबारे फोरेन्सिक ल्याबबाट आएको कल रिपोर्ट सार्वजनिक गर्न पनि उनले माग गरे ।

‘गृहमन्त्रीले राजस्व अनुसन्धान विभागले गरिरहेको अनुसन्धानलाई सिआईबीमा लिएर जाने कुरा रह्यो, राज्यका निकायलाई विश्वास गरौँ । अभियोजनको प्रक्रियासम्म पुग्न दिऔँ भन्नेकुरा गर्नुभयो । गृहमन्त्रीजीलाई मेरो एउटा प्रश्न छ, कुन कानूनमा टेकेर त्यसो गर्नुभयो ?’, उनले भने, ‘कुनैपनि प्रक्रियामा जाँदा कुनै न कुनै कानूनलाई टेकेर गर्नुपर्छ । हामी कानूनी राज्यमा छाै। आम नेपाली जनतालाई स्पष्ट पारिदिनुहोला कि कुन कानूनमा टेकेर यो राजस्व अनुसन्धानबाट सिआईबीमा लैजानुभयो ?’

त्यस्तै रास्वपाका प्रमुख सचेतक सन्तोष परियारले राजनीतिक पार्टीका आफ्ना स्वार्थका कारण संसद चल्न नसकेको भन्दै दुखेसो व्यक्त गरे ।