भारतबाट बढेर आयो डिजेल पेट्रोलको मूल्य

नेपालभ्युज

काठमाडौं। भारतबाट डिजेल तथा पेट्रोलको भाउ बढेर आएको छ। भारतीय आयल कर्पोरेसन (आईओसी)ले नेपाल आयल निगमलाई पठाएको मूल्यसूचीअनुसार पेट्रोल प्रतिलिटर ७ रुपैयाँ ८७ पैसा र डिजेल ६ रुपैयाँ ६१ पैसाले बढेर आएको हो ।

आईओसीले पठाएको सूचीअनुसार नेपालमा पनि स्वचालित प्रणालीबाट मूल्य समायोजन हुनेछ। आईओसीले हरेक १५–१५ दिनमा नयाँ मूल्यसूची पठाउँछ । सोअनुसार स्वचालित प्रणालीबाट निगमले मूल्य समायोजन गर्नेछ ।

यता, ग्यासको मूल्य भने प्रतिसिलिन्डर करिब १ सय रुपैयाँ घटेर आएको छ। योसँगै नेपालमा पनि ग्यासको मूल्य घट्नेछ ।

केही दिनयता अन्तर्राष्ट्रिय बजारमा कच्चा तेलको भाउ लगातार बढेको छ । जसले गर्दा भारतबाट आउने प्रशोधित तेलको मूल्यसमेत बढेको हो ।