थाइल्यान्डको एक बारुद गोदाममा विस्फोट, १० जनाको मृत्यु

बैंकक। दक्षिणी थाइल्यान्डमा अनुमति नलिई सञ्चालन गरिएको बारुद गोदाममा भएको शक्तिशाली विस्फोटमा ज्यान गुमानेको सङ्ख्या १० पुगेको स्थानीय गभर्नरले बताएका छन् । अनुमति बिना गोदाम सञ्चालन गरेको आरोपमा गोदामका मालिकलाई प्रहरीले खोजी गरिरहेको छ ।

शनिबार दिउँसो सुङ्गाई कोलोक सहरस्थित एक भवनको गोदामनजिक वेल्डिङ गर्दा झिल्का लागेर विस्फोट हुँदा एक सयभन्दा बढी घाइते भएका तथा सयौँ घरमा गम्भीर क्षति भएको स्थानीय सञ्चारमाध्यमहरूले जनाएका छन् ।

“हामीले १० जनालाई पहिचान गरेका छौं र दुईवटा शवका भाग फेला पारेका छौँ जसको हामीले अझै पहिचान गर्न सकेका छैनौँ, डीएनए परीक्षणका लागि सम्बन्धित निकायमा पठाइएको छ,” नाराथिवाटका प्रान्तीय गभर्नर सानन पोंगाक्सर्नले पत्रकार सम्मेलनमा भनेका छन् ।

नरथिवाटका प्रहरी कमान्डर, प्रहरी मेजर जनरल चालर्मपोर्न खाम्खिउले विस्फोट हुनुभन्दा केही समयअघि वारुद गोदामबाट पटाका क्रेतासमक्ष आपूर्ति गरिएको बताएका छन् । गोदामको एक हजार किलो बारुद विस्फोट भएको उनले बताए ।