गौर हत्याकाण्डविरुद्ध सर्वोच्चमा मुद्दा दर्ता

काठमाडौं। २०६४ चैत २७ गते रौतहटको गौरमा भएको नरसंहारविरुद्ध आइतबार सर्वोच्च अदालतमा मुद्दा दर्ता भएको छ। तत्कालीन अवस्थामा मधेसी जनअधिकार फोरम र नेकपा माओवादीको कार्यक्रम एकै स्थानको नजिक–नजिक आयोजना हुँदा ‘गौर हत्याकाण्ड’ भएको थियो।

उक्त घट्नामा माओवादीका २७ जनालाई बाँसको भाटा र भाला रोपेर हत्या गरिएको र यसलाई ‘गौर हत्याकाण्ड’ भनिँदै आएको छ।

आइतबार त्रिभुवन साहले प्रधानमन्त्री तथा मन्त्रिपरिषदको कार्यालयलाई विपक्षी बनाएर मुद्दा दर्ता गरेका हुन् । तर, केही दिन अगाडि प्रधानमन्त्री पुष्पकमल दाहाल प्रचण्डले समेत गौर हत्याकाण्ड र २०५८ जेठ १९ को दरबार हत्याकाण्डको छानबिन हुने बताएका थिए।

गौर हत्याकाण्ड विरुद्धको मुद्दाको पेशी भोलि सोमबारलाई तोकिएको छ । केही दिन अगाडि आम जनता पार्टीका अध्यक्ष एवं रौतहटका सांसद प्रभु साहसमक्ष गौर हत्याकाण्डमा ज्यान गुमाएकाको परिवारले घटनाको निष्पक्ष छानबिन माग गरेका थिए।

सांसद साह रौतहटकै भएको र गौर हत्याकाण्डको समयमा उनी माओवादीका प्रभावशाली नेताको रूपमा चिनिन्थे । त्यसपछि पटक–पटक सोही ठाउँबाट सांसद जितेर मन्त्री भएका साहले घटनाको छानबिनमा चासो दिनुपर्ने पीडितको माग छ।