शरणार्थी प्रकरणको अनुसन्धान प्रतिवेदन प्रहरीले सरकारी वकिल कार्यालयमा बुझायो

काठमाडौं। नक्कली भुटानी शरणार्थी प्रकरणमा करिब ३३ जना संलग्न रहेको निष्कर्षसहित प्रहरीले प्रतिवेदन सरकारी वकिलको कार्यालयमा प्रतिवेदन बुझाएको छ। झन्डै दुई महिना लामो अनुसन्धानपछि जिल्ला प्रहरी परिसर काठमाडौंले आज प्रतिवेदन बुझाएको हो।

करोडौँ असुली गर्ने प्रयासमा कम्तीमा ३२ जना संलग्न रहेको निष्कर्ष छ। १६ जना जिल्ला प्रहरी परिसर, काठमाडौं र मातहतका इकाइको हिरासतमा छन्। थप १६ जनालाई फरार प्रतिवादीका रूपमा प्रतिवेदनमा समावेश छ। रायसहितको अनुसन्धान प्रतिवेदन जिल्ला सरकारी वकिलको कार्यालयमा बुझाएको काठमाडौं प्रहरी परिसरका एक अधिकृतले बताए।

ती अधिकृतले भने, ‘‘केहीलाई ठगी र सङ्गठित अपराधसहित केहीलाई लिखतसम्बन्धी कसुर (कीर्ते)मा मुद्दा चलाउन प्रहरीले सिफारिस गरेको छ। केहीलाई अख्तियार दुरुपयोग अनुसन्धान आयोग र सम्पत्ति शुद्धीकरण अनुसन्धान विभागबाट पनि मुद्दा चलाउन सिफारिस गरिएको छ।’’

नेपाली नागरिकलाई भुटानी शरणार्थी बनाएर अमेरिका पठाइदिन्छु भन्दै १०६ जना पीडितबाट कम्तीमा २४ करोड रुपैयाँ ठगी भएको उजुरी परेपछि अनुसन्धान थालिएको थियो।