सियारी गाउँपालिका अध्यक्षको घरनजिकै प्रेसर कुकर बम फेला

नेपालभ्युज

काठमाडौं। रूपन्देहीको सियारी गाउँपालिकाका अध्यक्षको घरलाई लक्षित गरी अज्ञात व्यक्तिहरूले बम राखेका छन् । सियारी गाउँपालिका वडा नम्बर ४ स्थित अध्यक्ष थानेश्वर घिमिरेको घरमा शनिबार प्रेसर कुकर बम फेला परेको हो।

घिमिरेको घर पछाडि कम्पाउन्ड बाहिरको गेटमा कुकर बम फेला परेको जिल्ला प्रहरी कार्यालय रुपन्देहीले जनाएको छ ।

सिमेन्टको बोराभित्र शंकास्पद वस्तु देखेपछि अध्यक्ष घिमिरेले बिहान साढे ९ बजे प्रहरीलाई खबर गरेका थिए। नेपाली सेना र प्रहरीको टोलीले उक्त बम साढे १२ बजेतिर डिस्पोज गरेको हो ।

तारजडित प्रेसर कुकरमा ‘खतरा’ लेखेर टाँसिएको थियो । जसमा मधेस पिपुल्स पार्टी नाम लेखेको पर्चासमेत भेटिएको छ । घटनाको थप अनुसन्धान भइरहेको प्रहरीले जनाएको छ ।