नवनियुक्त अर्थमन्त्रीलाई उद्योगीको सुझाव

काठमाडौं। नेपाल उद्योग वाणिज्य महासंघका अध्यक्ष शेखर गोल्छाले अहिले बजारमा तरलता प्रवाह गरेर ब्याजदर घटाउनुपर्ने बताएका छन्।
आइतबार बिहान अर्थमन्त्री डा. प्रकाशशरण महतसँगको भेटमा उनले यस्तो बताएका हुन्। महासंघको पदाधिकारी टोली र अर्थमन्त्री बीचको भेटमा अर्थतन्त्रको अवस्थाबारे पनि ब्रिफ्रिङ गरिएको थियो।

अर्थ मन्त्रालयमा भएको भेटमा अध्यक्ष शेखर गोल्छाले नवनियुक्तलाई सिंगो निजी क्षेत्रका तर्फबाट अर्थतन्त्रको अवस्थाबारे बताएका थिए । उनले अर्थतन्त्र सुधारका लागि केन्द्रीय बैंक र सरकारले संयुक्त पहलमा तरलता प्रवाह गरेर ब्याजदर झार्नुपर्ने सुझाव दिए।

सहकारी र लघुवित्तमा तरलता बढाउने गरी काम अघि बढाउन पनि अध्यक्ष गोल्छाले जोड दिए । सरकारी खर्च निकै सुस्त रहेको भन्दै अहिले करिब २४ प्रतिशत मात्र रहेको सरकारी खर्चलाई विस्तार गर्न अर्थमन्त्रीसँग माग गरे।

सरकारसँग राजस्व कम उठेको र चालु खर्च धान्न मुस्किल परेको बारेमा उनले बाहिरी ऋण उठाएर भए पनि खर्च गर्नुपर्ने सुुझावसमेत दिए । बाहिरबाट लिएको ऋण, विकास खर्च गर्नलाई मात्र प्रयोग गर्नुपर्ने भन्दै अध्यक्षले राज्यसंयन्त्र पूर्णरूपमा प्रयोग गरेर सीमाबाट हुने अवैध आयात रोक्नुपर्ने र त्यसले राजस्व वृद्धिमा समेत सहयोग पुर्‍याउने सुझाव पनि दिए।

सो भेटमा नवनियुक्त अर्थमन्त्री डा. महतले समस्याग्रस्त अर्थतन्त्र सुधार नै आफ्नो पहिलो प्राथमिकता र प्रतिबद्धता रहेको विस्वास दिलाए। उनले यसमा निजी क्षेत्रको पनि सुझाव र सहकार्यबाट अगाडि बढ्ने बताए ।