कांग्रेस नेतृत्वको सुप सरकारलाई सघाउन प्रचण्डको निर्देशन, माओवादीले विश्वासको मत दिने

काठमाडौं । सुदूरपश्चिमको सरकारलाई माओवादीले विश्वासको मत दिने भएको छ । प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले कांग्रेस नेतृत्वको सरकारलाई विश्वासको मत दिन पार्टीको सुदूरपश्चिम प्रदेशसभा संसदीय दललाई निर्देशन दिएका हुन् ।

यसअघि प्रदेश कमिटीले केन्द्रबाट निर्देशन आएपछि मात्रै मुख्यमन्त्री कमलबहादुर शाहलाई विश्वासको मत दिने बताएको थियो । प्रदेश सभा माओवादी संसदीय दलले केन्द्रबाट निर्देशन नआए विश्वासको मत नदिने निर्णय गरेको थियो ।

आइतबार बिहान प्रचण्डले मुख्यमन्त्री शाहलाई विश्वासको मत दिन निर्देशन गरेपछि सुदूरपश्चिम सरकारले विश्वासको मत पाउने भएको छ । एकीकृत समाजवादीले कांग्रेससँग सत्ता साझेदारी गरिसकेको छ भने नागरिक उन्मुक्तिले पनि विश्वासको मत दिने निर्णय गरेको छ ।