आकस्मिक बिदाका दिन बैंक बन्द गर्न नपाइने

काठमाडौं। नेपाल राष्ट्र बैंकले सरकारले दिने आकस्मिक बिदाका दिन अब बैंक तथा वित्तीय संस्था बन्द गर्न नपाइने जनाएको छ ।
शुक्रबार बैंक तथा वित्तीय संस्थालाई जारी गरेको एकीकृत निर्देशन २०७९ मा संशोधन तथा परिमार्जन गर्दै राष्ट्र बैंकले यस्तो प्रावधान ल्याएको हो ।

तत्काल लघुवित्त बाहेक क, ख र ग वर्गका बैंक तथा वित्तीय संस्थालाई मात्रै यो प्रावधान लागू हुनेछ । नेपाल राष्ट्र बैंकले जारी गरेको बैंक बिदाको सूचीबाहेक नेपाल सरकारले आकस्मिक बिदा दिएको दिन नगद कारोबार,चेक क्लियरेन्स, आरटीजीएसजस्ता अत्यावश्यक बैंकिङ सेवा नियमित गर्नुपर्ने छ ।

यस्तो बिदाको दिन १० बजेदेखि १ः३० बजेसम्म कार्यालय खुला राख्नसमेत राष्ट्र बैंकले समय नै तोकेको छ । आकस्मिक बिदा दिने र बैंक बन्द हुने प्रचलनले ग्राहक समस्यामा पर्दै आएका थिए ।

यस बेला बैंक तथा वित्तीय संस्थाले आवश्यक विभाग र कार्यालय खुला राखेर सेवा सुरु गर्नुपर्ने राष्ट्र बैंकको निर्देशन छ ।