यती एयर दुर्घटनाका मृतकप्रति खेदजनक टिप्पणी गर्ने व्यक्ति पत्ता लाग्यो

काठमाडौं। माघ १ गते पोखरामा यती एअरको एटीआर जहाज दुर्घटना हुँदा ७२ जनाको ज्यान गएपछि मृतकप्रति फेसबुकमा जथाभाबी लेख्ने व्यक्तिको पहिचान भएको छ।

सारा देश शोकमा डुबेको समयमा अरूको फोटो प्रयोग गरेर जथाभाबी लेख्दै असंवदेनशील टिप्पणी गर्ने व्यक्ति बेलायतमा रहेको पत्ता लागेको प्रहरीको साइबर ब्युरोले जनाएको छ।

फेसबुकमा नक्कली आइडी बनाएर धेरैलाई हैरानी दिने इटहरीका ३६ वर्षीय मिलन गुरुङ रहेको खुलेको हो। युकेको ००४४७३८६६६––३७ नम्बरबाट उक्त फेसबुक उनले चलाइरहेको प्रहरीले जनाएको छ।

भोजपुरमा जन्मिएका मिलन गुरुङ सुनसरीको इटहरी नगरपालिका–२ तरहरा बस्दै आएका थिए। उनी अहिले वैदेशिक रोजगारीका क्रममा युकेमा बसोबास गरिरहेका पाइएको साइबर ब्युरोका प्रहरी निरीक्षक राजकुमार खड्गीले बताए।

दुर्घटनामा दिवङ्गत भएका डाक्टर, एअर होस्टेस र नाबालकको बारेमा उनले लेखेका चरम घृणायुक्त पोस्ट भाइरल भएको थियो। सामाजिक सञ्जालमा ती व्यक्तिको पहिचान गरी कारबाही गर्न माग उठेको थियो।

तर अरूको फोटो र नाम प्रयोग गरेर फेसबुक आइडी बनाइएकोले ती व्यक्ति व्यक्ति को हुन् भन्ने पत्ता लागिरहेको थिएन। हवाई दुर्घटनामा ‘अपराधी’हरूको मृत्यु भएकामा आफूले घरमा भोज राखेको’ सम्म लेख्न भ्याएका थिए। साथै एयर होस्टेस् र मृतक अरू महिलाप्रति पनि घृणायुक्त टिप्पणी गरेका थिए।

युकेमा बसेर असभ्य, अश्लील र संवेदनशील टिप्पणी गर्ने र धेरै महिलाहरूलाई हैरानी दिएको भन्दै बुधबार काठमाडौँ जिल्ला अदालतबाट मिलन गुरुङविरुद्ध पक्राउ पुर्जी प्रहरीले लिएको छ।

सन् २०१९ को अक्टोबर महिनामा पछिल्लो पटक युके पुगेका मिलनले जहाज दुर्घटनाभन्दा धेरै पहिलेदेखि नै महिलाहरूलाई अश्लील सन्देश पठाउने र मानसिक यातना दिने गरेको पाइएको साइबर ब्युरोका प्रहरी निरीक्षक राजकुमार खड्गीले बताए। उनलाई पक्राउ गरेर नेपाल पठाइदिन इन्टरपोललाई आग्रह गरिएको जनाइएको छ।