यो हो नेपालका पहिलो गभर्नर हिमालय शमशेरले हस्ताक्षर गरेको पहिलो नेपाली नोट

नेपालभ्युज

काठमाडौं। नेपाल राष्ट्र बैंकको पहिलो गभर्नर हिमालय शमशेर जबराको ९५ वर्षको उमेरमा आइतबार बिहान निधन भएको छ । उनी नेपाली नोटमा हस्ताक्षर गर्ने पहिलो गभर्नर हुन् ।

सामाजिक सञ्जाल फेसबुकमा पुराना मुद्रा संकलकहरूले यो नोट राखेर हिमालय शमशेरको स्मरण गरेका छन् ।

हिमालय शमशेर विगत ५ वर्षदेखि पार्किन्सन्सको समस्याबाट पीडित थिए । उनको थापाथलीस्थित नर्भिक इन्टरनेसनल हस्पिटलमा उपचारका क्रममा निधन भएको हो ।

**नेपालका पहिलो गभर्नर तथा हिमालय बैंकका संस्थापक हिमालय शमशेर जबरा**

स्वर्गीय राणा तत्कालीन श्री ५ को सरकारको सचिव हुँदै नेपाल राष्ट्र बैंकको पहिलो गभर्नर बनेका हुन् । राजा महेन्द्रले राष्ट्र बैकको स्थापना गरेर गभर्नरको नियुक्ति दिँदा उनको उमेर मात्र २९ वर्ष थियो । उनी हिमालयन बैंकको संस्थापक पनि हुन् ।