पाकिस्तानी मन्त्रीले दिइन् भारतलाई एटम बमको धम्की

नयाँ दिल्ली। पाकिस्तानकी विदेशमन्त्री शाजिया मारीले भारतलाई परमाणु बमको धम्की दिएकी छन् । उनले पाकिस्तान आणविक अवस्थालाई लिएर चुप लागेर बस्न नहुने पनि बताएको बीबीसीले जनाएको छ ।  समाचार एजेन्सी एएनआईका अनुसार पाकिस्तान पिपुल्स पार्टीकी नेतृ शाजिया मारीले बोल न्यूजसँगको अन्तरवार्तामा भारतलाई परमाणु बमको धम्की दिएकी हुन् ।

शाजियाले भनिन्, ‘भारतले हामीसँग एटम बम छ भन्ने कुरा बिर्सनु हुँदैन । हाम्रो आणविक हतियार मौन बस्नलाई बनाएको होइन । आवश्यक परेमा हामी पछि हट्ने छैनौं।’  उनले भारतीय मन्त्रीहरु नरेन्द्र मोदीको अन्धभक्त बनेर विभिन्न फोरममा पाकिस्तानलाई आतंकवादको केन्द्र भन्दै लगाएको आरोपबारे पनि चर्को रिस पोखेकी छिन् ।

यद्यपि शाजियाले आफ्नो बयानपछि एएनआईको समाचारलाई रिट्वीट गर्दै संयमता अपनाएकी छिन् । उनले लेखेकी छिन्, ‘पाकिस्तान एक जिम्मेवार आणविक देश हो। भारतीय सञ्चारमाध्यमका कतिपय तत्वले हंगामा मच्चाउन खोजिरहेका छन् । भारतीय मन्त्रीको भड्कावपूर्ण भनाइप्रति पाकिस्तानी विदेशमन्त्रीले प्रतिक्रिया दिएका छन् । आतंकवादविरुद्धको लडाइमा पाकिस्तानले भारतभन्दा धेरै गुमाएको छ । मोदी सरकारले अतिवाद र फासीवादलाई बढावा दिइरहेको छ ।’

पाकिस्तानका विदेशमन्त्री बिलावल भुट्टोले भारतका प्रधानमन्त्री नरेन्द्र मोदीलाई लिएर दिएको विवादास्पद बयानपछि शाजियाको बयान आएको हो । उनले भुट्टोको भनाइको समर्थन गरेकी छिन् ।  बिलावल भुट्टोले भनेका थिए, ‘ओसामा बिन लादेन मरेका छन् तर ‘गुजरातका कसाई’ जीवित छन् । र उनी भारतका प्रधानमन्त्री हुन् । प्रधानमन्त्री नहुँदासम्म उनलाई अमेरिका आउन प्रतिबन्द लगाएको थियो ।’

यस वक्तव्यको भारतमा चर्को विरोध भएको थियो र भाजपाले पाकिस्तानी दूतावास अगाडि विरोध प्रदर्शन पनि गरेको थियो। यसअघि संयुक्त राष्ट्र संघमा भारतका विदेशमन्त्री एस जयशंकरले पाकिस्तानलाई आतंकवादको केन्द्र भएको भन्दै आलोचना गरेका थिए ।

Pakistan is a responsible nuclear state. Some elements in Indian media trying to create panic. Pakistan’s FM responded to inciting comments by Indian Minister. Pakistan has sacrificed far more than India in the fight against terrorism.Modi Sarkar is promoting extremism & fascism. https://t.co/3v4psXRfWk

— Shazia Atta Marri (@ShaziaAttaMarri) December 17, 2022