नेपथ्यले गर्‍यो विराटनगरबाट ‘मानवताको लागि संगीत’ को भव्य सुरुवात

विराटनगर। दुई दशकअघि ‘शान्तिको लागि शिक्षा’ अभियानको सुरुवात गरिएको विराटनगरबाटै लोक रक ब्यान्ड नेपथ्यले ‘मानवताको लागि संगीत’ अभियानको भव्य सुरुवात गरेको छ । अभियानको पहिलो ध्वनि शुक्रबार बेलुकी यहाँस्थित हाटखोला मैदानमा फैलिँदा हजारौं दर्शकहरूको उत्साह मिश्रित आवाजले गुञ्जायमान भएको थियो ।

अघिल्ला कन्सर्टहरूभन्दा बेग्लै यसपाला नेपथ्यले पहिलो गीतै ‘भेंडाको ऊनजस्तो’ प्रस्तुत गर्‍यो । गाउनु अघिको धुनमा परिमार्जनसहित केही नयाँपन दिएर सुरु गरिएको उक्त गीतदेखि नै सुरु भएको दर्शकहरूमा तीव्र तापक्रम कन्सर्टको अन्तिमसम्मै जारी देखिन्थ्यो ।

दर्शकहरूमा सुरुदेखि जागेको तापक्रमलाई निरन्तरता दिनकै निम्ति दोस्रो गीतमा ‘छेक्यो छेक्यो’, तेस्रो ‘लामपाते सुरती’ र त्यसपछि पनि ‘चरि मर्‍यो’ र ‘जोमसोमे बजारमा’ जस्ता गीतहरूको निरन्तरता साथ अघि बढाइएको थियो।

‘अर्को जुनी छ कि छैन थाहा छैन,’ उनी भनिरहेका थिए, ‘पुण्य कमाउने हो भने यसै जुनीमा र आजैबाट दान गर्न सुरु गरौं ।’ गायक गुरुङले चुनावपछि फेरि समाजमा एकताको आव्हान गर्दै त्यसले नै स्थिरता र विकास दिने तर्क पनि राखेका थिए ।

विराटनगरको कन्सर्ट सम्पन्न भएपछि ७० सदस्यीय नेपथ्य टोली पाँचवटा ट्रक, दुइटा बस र केही साना सवारीमार्फत वीरगञ्जतर्फ प्रस्थान गरेको छ । मानव सेवा आश्रमकै आयोजनामा त्यहाँस्थित आदर्शनगर रंगशालामा नेपथ्य मंसिर १९ गते सोमबार प्रस्तुत हुँदैछ ।