कैलाली कांग्रेसले बागी उम्मेदवारसहित १० जनालाई गर्‍यो कारबाही

धनगढी। नेपाली कांग्रेस कैलालीले बागी उम्मेदवारसहित १० जना नेता तथा कार्यकर्तालाई पार्टीबाट निष्कासित गरेको छ।

कांग्रेस जिल्ला कार्यसमिति कैलालीले सत्ता गठबन्धनका आधिकारिक उमेदवारविरुद्ध उभिएकाहरूलाई पार्टीबाट निष्कासित गरेको हो। कारबाहीमा पर्नेमा ६ जना उम्मेदवार तथा चारजना उम्मेदवारका प्रस्तावक र समर्थक रहेका छन्।

उनीहरूलाई पाँच वर्ष साधारण सदस्यसमेत नरहने गरी कारबाही कांग्रेस कैलालीका सभापति नारायणदत्त भट्टद्वारा जारी विज्ञप्तिमा उल्लेख छ।

कारबाहीमा पर्नेमा कैलाली क्षेत्र नम्बर ५ ख मा उम्मेदवारी दिएका क्षितिज भण्डारी, क्षेत्र नम्बर ३ मा उम्मेदवारी दिएका नविन कुमार बोहरा, २ ख मा भरतकुमार शाही, ३ ख का गोविन्दराज जोशी, ३ ख कै लक्ष्मण शाही र ४ ख की भगवती पाठक रहेकी छन्।

यस्तै भरत कुमार शाहीका समर्थक कमल कुमार विक, गोविन्दराज जोशीका प्रस्तावक कमलबहादुर बडुवाल र समर्थक देवीराम खत्री पनि पार्टीबाट निष्कासित भएका छन्।

त्यस्तै क्षेत्र नम्बर ५ को प्रतिनिधि सभाका स्वतन्त्र उम्मेदवारको समर्थक बसेका नवराज जोशीलाई पनि कांग्रेसले कारबाही गरेको छ। जोशी स्वतन्त्र उम्मेदवार पुष्करनाथ ओझाको समर्थक बसेका थिए।