इराकमा प्रहरी र धर्मगुरुका समर्थकबीच भीषण लडाइँ, २० जनाको ज्यान गयो

बग्दाद। इराकको राजधानी बग्दादमा इराकी सुरक्षा बल र शक्तिशाली शिया धर्मगुरुका समर्थकहरूबीच रातभर भएको भिडन्तमा कम्तीमा २० जनाको ज्यान गएको छ । धर्मगुरु मुक्तादा अल-सद्रका समर्थक प्रदर्शनकारीहरूले राष्ट्रपति भवनमा आक्रमण गरेपछि सुरक्षा बलले भगाउन खोज्दा २० जनाको ज्यान गएको र दर्जनौं घाइते भएका अधिकारीहरूलाई उधृत गर्दै बीबीसीले जनाएको छ ।

इराकका कार्यवाहक प्रधानमन्त्रीले शान्त रहन आह्वान गरेका छन् र अन्य धेरै शहरहरूमा अशान्ति भएपछि सेनाले राष्ट्रव्यापी कर्फ्यू घोषणा गरेको छ।  सोमबार रातीको झडप हालैका वर्षहरूमा इराकी राजधानीमा भएको सबैभन्दा नराम्रो हिंसामध्ये एक हो ।

विपक्षी लडाकुहरूले गोलीबारी र ट्रेसर राउन्डहरू प्रहार गरेपछि सुरक्षा बलले गोली चलाएको थियो । सामाजिक सञ्जालमा पोष्ट गरिएका भिडियोहरूमा केही लडाकुहरूले रकेट-प्रोपेल्ड ग्रेनेडहरू लगायतका भारी हतियारहरू प्रयोग गरेको देखिन्छ।

इरानले युद्धको बीचमा इराकसँगको आफ्नो नाका बन्द गरेको छ  । कुवेतले आफ्ना नागरिकहरूलाई तुरुन्तै देश छोड्न आग्रह गरेको छ। संयुक्त राष्ट्रका महासचिव एन्टोनियो गुटेरेसका प्रवक्ताले घटनाबाट आफू चिन्तित भएको र स्थितिलाई कम गर्न तत्काल कदम चाल्न आह्वान गरेका छन् । अन्तरिम प्रधानमन्त्री र धर्मगुरु सद्रका सहयोगी मुस्तफा अल-काधिमीले मन्त्रिपरिषद् बैठकहरू स्थगित गरेका छन् र प्रभावशाली धर्मगुरुलाई हस्तक्षेप गर्न र हिंसा रोक्न बिन्ती गरेका छन्।  सद्रले राजनीतिक जीवनबाट पछि हटेको घोषणा गरेपछि हिंसा फैलिएको थियो  ।

उनले प्रतिद्वन्द्वी शिया नेताहरू र पार्टीहरूले इराकी राजनीतिक प्रणाली सुधार गर्न नसकेको आरोप लगाएका थिए । अक्टोबरमा भएको निर्वाचनमा सद्रका उम्मेद्वारहरूले इराकको संसदमा सबैभन्दा बढी सिट जितेका थिए तर उनी सरकार गठन गर्न पर्याप्त सीटहरू प्राप्त गर्न असफल भए। उनले इरानी समर्थित शिया समूहहरूसँग वार्ता गर्न अस्वीकार गरेपछि झण्डै एक वर्षदेखि राजनीतिक अस्थिरता फैलिएको थियो।