विदेशबाट सुनका गरगहना लगाएर आउनेलाई विमानस्थलमा कडाइ नगर्न माग

काठमाडौं। नेपाल सुनचाँदी व्यवसायी महासंघले विदेशबाट सुनका गरगहना लगाएर आउनेलाई विमानस्थलमा कडाइ नगर्न माग गरेको छ।

महासंघका अध्यक्ष माणिकरत्न शाक्यको नेतृत्वमा मंगलबार भन्सार विभाग पुगेको महासंघको प्रतिनिधिमण्डलले विभागका महानिर्देशक कमल प्रसाद भट्टराईलाई कडाइ अवरोध नगर्न अनुरोध गरेका हुन्।

नेपाली मौलिक गरगहना लगाएर विदेशबाट नेपाल आउँदा त्रिभुवन अन्तर्राष्ट्रिय विमानस्थल भन्सार कार्यालयमा अनावश्यक रुपमा कडाइ हुने गरेको भन्दै सुनचाँदी व्यवसायीहरुले त्यसमा सहजीकरण गर्न आग्रह गरेका हुन्।

महानिर्देशक भट्टराईसँगको भेटका क्रममा महासंघका अध्यक्ष शाक्यले नेपाली मौलिक गरगहना लगाएर विदेशबाट नेपाल आउँदा ५० ग्रामभन्दा बढीको सुनका गहना ल्याएमा त्यसको भन्सार लिने गरिएको प्रति असन्तुष्टि जनाए। विमानस्थल भन्सारबाट आवतजावत गर्दा अवरोध गर्न नहुने उनको भनाइ छ।

विद्यमान व्यवस्था अनुसार विदेशबाट नेपाल आउँदा प्रत्येक व्यक्तिले ५० ग्रामसम्म सुनका गहना भन्सार छुटमा ल्याउने पाउने व्यवस्था छ। तर गरगहनाको हकमा यस्तो सीमा निर्धारण गरिएको छैन। नेपालबाट बाहिर जाँदा गरगहना लगाएर जान पाइने, तर बाहिरबाट नेपाल आउँदा ५० ग्राम भन्दा बढी गरगहना लगाएको पाइए त्यसको समते भन्सार लिने गरेको पाइएपछि व्यवसायीहरुले त्यसको विरोध गरेका हुन्।

भन्सार विभागका महानिर्देशक भट्टराईले व्यवसायीका समस्याको अध्ययन गरी त्यसलाई सम्बाेधन गर्न पहल गर्ने बताए। कतिपय व्यक्तिले गगहनाको बहाना बनाएर अवैध रुपमा सुन नै ल्याउन खोजेको भेटिएपछि यसका कडाइ गर्नुपरेको उनकाे भनाइ छ।