भीमदत्त नगरको श्वेतपत्र : तिर्न बाँकी दायित्व नै ३९ करोड ३३ लाख ८८ हजार ८३८ रुपैयाँ

कञ्चनपुर। भीमदत्त नगरपालिकाले अघिल्लो कार्यकालको आर्थिक दायित्व र आगामी लक्ष्यसहितको श्वेतपत्र जारी गरेको छ। नगरपालिकाको यही ८ असारमा बस्ने नगर सभा बैठकको पूर्वसन्ध्यामा नगरपालिकाले श्वेतपत्र जारी गरिएको हो।

श्वेतपत्रमा अघिल्लो कार्यकालको ३९ करोड ३३ लाख रुपैयाँ दायित्व देखिएको छ। यसमा ३८ करोड ६८ लाख पूँजीगत र ६५ लाख ४६ हजार चालु खर्च छ। नगरपालिकाको पूँजीगततर्फ हालसम्मको भुक्तानी गर्न बाँकी रकम नगरपालिकाको प्रशासनिक भवनको सङ्घबाट प्राप्त हुने समपूरक रकम ६ करोड ७५ लाखबाहेक कूल पूँजीगत तिर्न बाँकी रकम ३८ करोड ६८ लाख ४१ हजार ९९८ रुपैयाँ रहेको छ।

चालु (दायित्व) तिर्न बाँकी रकम ६५ लाख ४६ हजार ८४० रुपैयाँ गरी जम्मा ३९ करोड ३३ लाख ८८ हजार ८३८ रुपैयाँ नगरपालिकाले तिर्नुपर्ने छ।

श्वेतपत्रमा बजेट सुनिश्चितता नभएर ठेक्का लगाएको, ठूलो रकम रकमान्तर गरिएको, डीपीआर प्रतिवेदन बनाइएको, आन्तरिक स्रोतले धान्न नसक्ने गरी कर्मचारी भर्ना गरिएको, इन्धन खर्चमा मितव्यतिता अपनाउन नसएिको र ठूलो मात्रामा कोटेशन गरिएको कारणबाट दायित्व बढेको उल्लेख गरिएको छ।

दायित्वलाई सङ्घ र प्रदेश सरकारसित पहल गरी घटाउने जाने नगरपालिकाको योजना छ। आन्तरिक स्रोतले मात्रै धान्न नसकिने भएकाले माथिल्लो सरकारसित पहल गरी आवश्यक निर्माणका कार्य सञ्चालन गरिने श्वेतपत्रमा उल्लेख गरिएको छ।

अघिल्लो कार्यकालका राम्रा कामलाई निरन्तरता दिँदै जाने, दरबन्दी पुनरावलोकन, भ्रष्टाचारमा शून्य सहनशीलताको नीति अपनाइने, सबै वडामा सेवाग्राहीलाई सहजरुपमा सेवा सुविधा दिने र नगरपालिकाकाभित्र हुने अनियमिततालाई छानबिनको दायरामा ल्याएर सुशासन कायम गर्ने श्वेतपत्रमा उल्लेख गरिएको छ।

नगरपालिकाका प्रवक्ता महेन्द्र खड्काले वर्तमान जनप्रतिनिधिले नगरपालिकाको जिम्मेवारी सम्हाल्दा अघिल्लो कार्यकालका गरिएका गतिविधि नगर बासिन्दालाई जानकारी गराउन श्वेतपत्र जारी गरिएको बताए।

“नगरपालिकामा आएर कार्यकाल सम्हाल्दा के कस्तो अवस्था थियो, त्यसको जानकारी गराउन यो श्वेतपत्र जारी गरिएको हो,” उनले भने, “दायित्व नतिर्ने भन्ने हुँदैन, तिर्छौं, त्यसका लागि सङ्घ र प्रदेशसित पनि समन्वय र पहल गर्छौं।”

श्वेतपत्रमा सेवा प्रवाहमा लापरवाही गर्ने कर्मचारीलाई कारबाही गर्ने घोषणा गरेको छ। भीमदत्तले जारी गरेको श्वेतपत्रमा सेवाग्राहीलाई झन्झट गरी नियतबश दुःख दिने कर्मचारीलाई नियमानुसार कारबाही गर्ने घोषणा गरिएको छ।

कर्मचारीको लापरवाहीका गुनासोका लागि हेल्प डेस्क, टोल फ्रि नम्बर र उजुरी पेटिका व्यवस्था गरिने श्वेतपत्रमा उल्लेख गरिएको छ।

श्वेतपत्रको आगामी लक्ष्यमा सबै वडामा सेवा प्रवाहलाई सहज र सरल बनाउने उल्लेख गर्दै लापरवाही गर्ने कर्मचारीलाई कारबाही गरिने उल्लेख गरिएको छ।

‘कही कतै सेवा प्रवाहमा अनावश्यक झन्झट गरी सेवाग्राहीलाई नियतवश दुःख दिन खोजे सम्बन्धित कर्मचारीलाई नियमानुसार आवश्यक कारबाही गरिनेछ,’ श्वेतपत्रमा भनिएको छ, ‘यसका लागि पालिकामा हेल्प डेस्क, टोल फ्री नम्बर र उजुरी पेटिकाको व्यवस्था गरिनेछ।’

श्वेतपत्रमा भ्रष्टाचारमा शून्य सहनशीलताको नीति लिइने उल्लेख गरिएको छ। नगरपालिकाको आर्थिक व्ययभार कम गर्न सङ्गठन सर्भेक्षणका अनुसार आवश्यकता र औचित्यको आधारमा दरबन्दी पुनरावलोकन गर्ने उल्लेख गरिएको छ।