महिलाविरुद्ध दुर्व्यवहार भएको निहुँमा हात हालाहाल, एक जनाको ज्यान गयो

काठमाडौं। महिलालाई दुर्व्यवहार गरेको विषय झडपमा बदलिँदा भक्तपुरस्थित मध्यपुरथिमिमा एक जनाको ज्यान गएको छ। मृत्यु हुनेमा मध्यपुर थिमी–८ का ५१ वर्षीय कल्याण साहु छन्।

प्रहरीले घटनामा संलग्न भएको अभियोगमा एक महिलासहित चार जनालाई पक्राउ गरेको छ । पक्राउ परेका चार जनालाई महानगरीय प्रहरी परिसर भक्तपुरमा राखिएको छ ।

महिलाविरुद्ध  दुर्व्यवहार गरेको विषय बढ्दै जाँदा झडप भएको र सोही झडप साहुको मृत्युको कारण भएको प्रारम्भिक अनुसन्धानबाट खुलेको महानगरीय प्रहरी परिसर भक्तपुरका प्रवक्ता डिएसपी राजु पाण्डेले बताए ।

प्रहरीका अनुसार शनिबार साँझ बोडेस्थित स्थानीय एक होटेलमा साहु प्रवेश गरेका थिए । होटेलभित्र एक महिलासहित केही मजदुर खाजा खाँदै थिए।

साहुको होहल्ला गर्दै रहे। साहुलाई होहल्ला रोक्न मजदुरले आग्रह गरे। तर उनले मानेनन्। यही क्रममा दुई पक्षबीच हात हालाहाल भएपछि मजदुरहरूले साहुको टाउकोमा प्रहार गरे । त्यसक्रममा उनको ज्यान गएको बताइएको छ।