नेपाल भ्रमणको तयारीमा रहेकी अमेरिकी उपविदेशमन्त्रीले भेटिन् अमेरिकास्थित नेपाली राजदूत खत्रीलाई

काठमाडौं। नेपाल भ्रमणको तयारीमा रहेकी अमेरिकी उपविदेशमन्त्री एवं तिब्बत मामिला हेर्ने अमेरिका सरकारको विशेष संयोजक उज्रा जियाले अमेरिकास्थित नेपाली राजदूत श्रीधर खत्रीसँग भेट गरेकी छन्। नेपाल भ्रमण गर्नुपूर्व अमेरिकी उपविदेशमन्त्री जियाले अमेरिकी विदेश मन्त्रालय स्टेट डिपार्टमेन्टमा खत्रीसँग भेट गरेकी हुन्।

अमेरिकी विदेश मन्त्रालयमा नेपालका राजदूत खत्रीसँग भएको भेटका अवसरमा लोकतन्त्र, महिला अधिकार र सबैका लागि समावेशीता प्रवर्द्धन गर्ने विषयमा अमेरिका र नेपालबीच हुँदै आएको साझेदारीका विषयमा छलफल भएको बताइएको छ। राजदूत खत्रीसँगको भेटपछि उपविदेशमन्त्री जियाले समाजिक सञ्जाल ट्विट गर्दै सो विषयको जानकारी दिएकी हुन्।

नेपालले अमेरिकी सहयोग परियोजना एमसीसी संसदबाट पारित गरेसँगै पछिल्लो समय अमेरिकाबाट नेपाल भ्रमणको क्रम बाक्लिएको छ। केही समयअघि मात्रै अमेरिकी सांसदको एक टोलीले नेपाल भ्रमण गरेको थियो भने जेठको पहिलो साता उपविदेशमन्त्री जियाले नेपाल भ्रमणको तयारी गरेकी छन्। एमसीसी पारित हुनुअघि र पछि अमेरिकाबाट नेपाल आउने सरकारी अधिकारीको संख्या बढेपनि उपविदेशमन्त्री जिया एक दशक यता अमेरिकाबाट नेपाल भ्रमण गर्ने सबैभन्दा उच्च तहको अमेरिकी प्रतिनिधि हुनेछिन्।

अमेरिकी उपविदेशमन्त्री जिया नेपाल भ्रमणमा आउनुअघि भारत भ्रमण गर्ने कार्यक्रम रहेको छ। भारत र नेपालको भ्रमण गर्ने तयारीमा रहेकी उपविदेशमन्त्री जियाको भ्रमणका विषयमा औपचारिक जानकारी नबाहिरिए पनि भारतीय सञ्चार माध्यमले पनि उनको भारत भ्रमण हुन लागेको जनाएका छन्। भारत भ्रमणका समयमा उपविदेशमन्त्री जियाले धर्मशालाको समेत भ्रमण गर्ने कार्यक्रम रहेको छ। तिब्बती शरणार्थीको राजधानीका रुपमा रहेको भारतको धर्मशाला भ्रमणका क्रममा अमेरिकी उपविदेशमन्त्री जियाले तिब्बती धर्म गुरु दलाई लामासहित तिब्बती नेताहरुलाई पनि भेट्ने बताइएको छ।

भारतको भ्रमणसँगै नेपालको भ्रमण गर्ने तयारीमा रहेको उपविदेशमन्त्री जियाले नेपाल भ्रमणका क्रममा नेपालमा रहेका तिब्बती शरणार्थीको हक हीतका विषयमा नेपाल सरकारसँग छलफल गर्ने अपेक्षा गरिएको छ। परराष्ट्र मन्त्रालयका अधिकारीअनुसार उपविदेशमन्त्री जियाको भ्रमणका क्रममा तिब्बती शरणार्थीका विषयमा छलफल हुन सम्भावना अधिक रहेका कारण आफूहरुले त्यसविषयमा आफ्नो तयारी गरेको बताए।

नेपालले लामो समयदेखि शरणार्थीका रुपमा बस्दै आएका तिब्बती शरणार्थीलाई शरणार्थी कार्ड उपलब्ध गराएको छैन। शरणार्थी कार्ड उपलब्ध नहुँदा उनीहरुलाई विदेश यात्रा गर्नदेखि बैंकमा खाता खोल्न समेत समस्या भएको शरणार्थीका प्रतिनिधि बताउँछन्। सरकारले नेपालका पूर्वी भागमा रहेका भुटानी शरणार्थीलाई शरणार्थी कार्ड उपलब्ध गराउने तयारी गर्दा तिब्बती शरणार्थीका विषयमा भने मौन रहँदै आएको छ। नेपालले अपनाएको एक चीन नीति विरोधी हुने बताउँदै नेपालले तिब्बती शरणार्थीलाई शरणार्थी कार्ड उपलब्ध गराएको छैन।