लिभरपुल एफए कप – रोमाञ्चक जित निकाल्दै लिभरपुल फाइनलमा

काठमाडौं। म्यानचेस्टर सिटीलाई पराजित गर्दै लिभरपुल एफए कपको फाइनलमा प्रवेश गरेको छ। गएराति वेम्बली स्टेडियममा भएको पहिलो सेमिफाइनलमा ३–२ को रोमाञ्चक जित निकाल्दै लिभरपुल उपाधि नजिक पुगेको हो।

लिभरपुलको जितमा सादियो मानेले दुई तथा इब्राहिमा कोनाटेले एक गोल गरे। सिटीका ज्याक ग्रेलिस र बेर्नान्डो सिल्भाले एकएक गोल फर्काए। खेलको नवौँ मिनेटमा कोनाटेको गोलमार्फत लिभरपुलले अग्रता लिएको थियो।

१७ औँ तथा ४५ औँ मिनेटमा मानेले गोल गर्दा लिभरपुलले पहिलो हाफमा ३–० आरामदायी अग्रता बनायो। ४७ औँ मिनेटमा सिटीका ग्रेलिसले गोल गर्दै खेललाई ३–१ को स्थितिमा ल्याए।

थप गरिएको समयमा सिल्भाले गोल गर्दै सिटीलाई खेलमा फर्काउने प्रयास गरे पनि त्यो पर्याप्त नबन्दा लिभरपुलले ३–२ को रोमाञ्चक जित निकाल्यो।