हेटौंडा अस्पताल र प्रतिष्ठान अलग्याए ढुंगा हानिन्छः पूर्वमुख्यमन्त्री पौडेल

हेटौंडा। बागमती प्रदेशका पूर्वमुख्यमन्त्री डोरमणि पौडेलले मदन भण्डारी स्वास्थ्य विज्ञान प्रतिष्ठानबाट हेटौंडा अस्पताललाई अलग्याए कडा कदम चालिने बताएका छन्।

बुधबार हेटौंडामा पत्रकार सम्मेलन गर्दै पौडेलले प्रतिष्ठानलाई हेटौंडा अस्पतालबाट अलग्याउने र भरतपुरमा सञ्चालन गर्ने प्रयत्नस्वरुप अध्यादेश ल्याइएको भन्दै आपत्ति जनाएका हुन्।

उक्त प्रतिष्ठान प्रदेश तथा मकवानपुरको गौरवको आयोजना रहेको भन्दै यसलाई भरतपुर लगिए ढुंगा हान्नेसमेत चेतावनी दिएका छन्। उनले आफू नेतृत्वको सरकारले स्थापना गरेको प्रतिष्ठानलाई कमजोर बनाउने र यहाँको स्वास्थ्य क्षेत्र विगतको जस्तै कमजोर बनाउन वर्तमान सरकार लागेको आरोप लगाए।

अस्पताललाई प्रतिस्ठान मार्फत विशेषज्ञ डाक्टर, अत्याधुनिक उपकरणहरूको सेवा विस्तारलाई बढाउँदै आईसीयू, एचडीयू, अक्सिजन प्लान्ट जस्ता सेवाहरू समेत विस्तार भइरकहको पौडेलले बताए।

“५० शैया, ३ सय शैया हुँदै हाल ५ सय शैयामा पुग्ने क्रममा रहेको र निर्माणाधीन भवन सम्पन्नपश्चात् सेवा अझ विस्तार हुने क्रममा रहेको थियो”, उनले भने, “अस्पताललाई प्रतिष्ठानबाट अलग गराएर पुनः रिफर अस्पतालमा झार्न तथा यस प्रतिष्ठानमा सञ्चालन भइरहेका तीन वटा विषयका कक्षाहरू भरतपुरमा सञ्चालन गर्न मकवानपुरबाट प्रतिनिधित्व गर्ने सांसद तथा मन्त्रीहरू स्वयं लागेका छन्।”

वर्तमान सरकारले यस्ता जनविरोधी कामलाई निरन्तरता दिइरहे त्यसको भण्डाफोर गर्दै गम्भीर रूपमा प्रतिरोध गरिने पौडेलले चेतावनी दिए।

प्रतिष्ठानमा प्रदेश सरकारको हालसम्म करीब १५ करोड लगानी भइसकेको र उक्त लगानी खेर जाने अवस्था आएको भन्दै उनले चिन्ता व्यक्त गरे। प्रतिष्ठानको थप विकासका लागि छुट्याइएको डेढ अर्ब बजेट ५-५ लाखका टुक्रे योजनामा खर्च गर्ने वर्तमान सरकारको निर्णय कार्यकर्ता पाल्ने योजना भएको उनको आरोप छ।

सरकारको यो कदम राजनीतक प्रतिशोध मात्रै नभएर मकवानपुरबासीलाई स्वास्थ्य र शिक्षामा पछि धकेल्ने कार्य भएको उनको दाबी छ। बागमती प्रदेश सरकारको मंगलबार बसेको मन्त्रीपरिषद्को बैठकले मदन भण्डारी स्वास्थ्य विज्ञान प्रतिष्ठान (पहिलो संशोधन) अध्यादेश लगायत ३ वटा अध्यादेश स्वीकृतीका लागि ल्याएको थियो।

संसदमा भएको अवरोधका कारण सरकारलाई तत्काल काम गर्न बाधा आएकाले अध्यदेशमार्फत काम चलाउनु परेको सरकारका प्रवक्ता एवम् आन्तरिक मामिला तथा कानून मन्त्री कृष्णप्रसाद शर्मा खनालले जानकारी दिए।

हेटौंडा अस्पतालमा चिकित्सा शिक्षाका अन्य विषयहरू अध्यापन गराउन लागि प्रयाप्त भौतिक संरचना र जनशक्ति नभएकाले प्रतिष्ठानबाट अलग गरिएको उनको भनाइ छ। प्रतिष्ठानमा अध्ययनरत विद्यार्थीहरूको शैक्षिक कार्यक्रमलाई बाधा नपार्नको लागि तत्काल चितवनको भरतपुर अस्पतालमा पठनपाठनको व्यवस्था मिलाइएको उनले जानकारी दिए।