दुर्व्यसनको डरलाग्दो चित्र : २१ प्रतिशत कैदीलाई लागूऔषधसम्बन्धी मुद्दा

काठमाडौं। गृह मन्त्रालयले नेपालमा लागूऔषध गम्भीर समस्याको रूपमा देखा पर्न थालेको भन्दै चिन्ता व्यक्त गरेको छ। बुधबार मन्त्रालयमा आयोजित पत्रकार भेटघाट कार्यक्रममा गृहसचिव टेकनारायण पाण्डेले पछिल्लो समय नेपालमा लागूऔषध प्रयोगकर्ताको संख्या बढ्दै गएको कारण विभिन्न अपराधिक घटना भइरहेको बताए।

सोही कार्यक्रममा मन्त्रालयका उपसचिव गोकर्णप्रसाद उपाध्यायले कारागारमा भएकामध्ये २१ प्रतिशत कैदीको मुद्दा लागूऔषधसम्बन्धी भएको बताए। कार्तिक २०७८ सम्मको तथ्यांकअनुसार नेपालको कारागारमा रहेका २६ हजार कैदीबन्दीमध्ये २१ प्रतिशतको मुद्दा लागूऔषधसम्बन्धी भएको जानकारी उनले दिए।

पछिल्लो सर्वेक्षणअनुसार नेपालमा १ लाख ३० हजार ४२४ जना लागूऔषधका प्रयोगकर्ता रहेका छन्। जसमध्ये  महिलाको संख्या ८ हजार ३७१ रहेको छ। ‘‘हाम्रो पछिल्लो सर्वेक्षण २०७६ सालमा भएको थियो। जसमा नेपालमा १ लाख ३० हजार ४२४ जना लागुऔषधका प्रयोगकर्ता रहेका छन् भन्ने देखाएको थियो,” उनले भने, ‘‘प्रयोगकर्ताहरूको वार्षिक वृद्धिद्धर ५.०६ प्रतिशतले वृद्धि भइरहेको छ। कारागारमा रहेका २६ हजार कैदीबन्दी मध्ये कार्तिक २०७८ सम्मको तथ्यांक हेर्दा २१ प्रतिशत कारागारका कैदीबन्दीहरु लागूऔषधकै मुद्दामा रहेका छन्।”

कुल अपराधमा लागूऔषधको हिस्सा ९ प्रतिशतभन्दा बढी रहेको उनले बताए।

उक्त कार्यक्रममा मन्त्रालयले लागूऔषध कारोबार हुने मुख्य ५ जिल्लामा काठमाडौं, रूपन्देही, कास्की, कैलाली र पर्सा रहेको पनि जानकारी गराइएको थियो। यसलाई नियन्त्रण गर्नका लागि सरकारले तीनै तहका सरकारी र गैर सरकारी क्षेत्रमा दीर्घकालीन सोच, नीति, कार्यक्रम क्रियाकलाप र बजेट तर्जुमा गर्नुपर्ने निष्कर्ष मन्त्रालयले निकालेको छ।