सुदूरपश्चिममा कांग्रेसले कसैसँग गठबन्धन गर्दैन: सभापति बलायर

धनगढी। नेपाली कांग्रेसका सुदूरपश्चिम प्रदेश सभापति वीरबहादुर बलायरले सुदूरपश्चिममा हालसम्म गठबन्धन नभएको र अबका दिनमा पनि नहुने दाबी गरेका छन्।

आइतबार नेपाली काँग्रेस डोटीले ‘घरघर जाऔँ, काँग्रेस जिताऔँ’ अभियान अन्तरगत जोरायलमा आयोजना गरेको आमसभालाई सम्बोधन गर्दै नेता बलायरले नेकपा माओवादी केन्द्र र नेकपा एकीकृत समाजवादीको गठबन्धन सरकार रहेको सुदूरपश्चिम प्रदेशमा नेपाली काग्रेसँग गठबन्धनमा नरहेको बताए।

माओवादी र समाजवादीले एका तर्फ गठबन्धन भन्ने अर्कातिर कांग्रेसलाई पेल्ने गरेकाले पनि गठबन्धन नहुने उनले बताए।

‘‘एकातिर गठबन्धन भन्ने अर्कातर्फ हामीलाई पेल्ने ? यो कस्तो गठबन्धन हो ?’’ उनले भने, ‘‘अब सुदूरपश्चिममा कांग्रेसको कसैसँग गठबन्धन छैन। कांग्रेसका हातले रुख चिह्न बाहेक अन्त भोट जाँदै जान्न, यो मेरो ऐलान हो।’’

यस्तै उनले सुदूरपश्चिममा कांग्रेस एक्लै बहुमतले विजयी हुने दावी समेत गरे।अघिल्लो निर्वाचनमा बढी मत बदर भएका कारण हार बेहोर्नु परेको बताउँदै आगामी निर्वाचनमा मतदाता शिक्षालाई प्रभावकारी बनाउन नेता कार्यकर्तालाई सुझाव दिए।