डायलासिस मेसिन छ, चलाउने जनशक्ति छैन

इलाम। ‘इलामका सहयोगीदाताहरू’ नामक संस्थाले इलाम अस्पतालमा रहेको डायलासिस मेसिन चलाउन पहल थालेको छ।

मिर्गौलाको परीक्षणका लागि आवश्यक उक्त मेसिन धरानको रोटरी क्लबले एक वर्षअघि नै तीन ओटा उपलब्ध भएका थियो। तर, दक्ष जनशक्ति र आर्थिक अभावमा मेसिन सञ्चालनमा आउन सकेको छैन। संस्थाले जिल्लास्थित सरोकारवालाबीच पहल गर्न आग्रह गर्दै तत्काल धर्मभक्त मानव अङ्ग प्रत्यारोपण केन्द्रमा इलाम अस्पतालका प्राविधिकलाई मेसिन सञ्चालनका लागि तालिम लिन पठाउने निर्णय गरेको छ। संस्थाका अध्यक्ष रतनलाल चौधरीले मेसिन चलाउन प्रतिमहिना रु पाँच हजार पाँच वर्षसम्म दिने घोषणा गरेका छन्।

“उपकरण भएर पनि प्रयोगमा नआउँदा धेरैले झन्झट खेप्नु परेको छ”, उनले भने, “जसरी भए पनि जिल्लामा नै सेवा दिने पहलमा लागेका छौँ।” विसं २०७३ मा स्थापित सहयोगी हातले न्यून आयस्तर भएका २५० भन्दा धेरैलाई उपचार सहयोग पुर्‍याइसकेको छ। संस्थाको कोषमा ४५ लाख रुपैयाँभन्दा बढी रकम जम्मा छ। यही कोषमा पछिल्लो पटक स्थानीय मनकुमारी उप्रेतीले ५० हजार रुपैयाँ सहयोग गरेका छन्।

अस्पतालका मेडिकल सुपरिटेन्डेन्ट प्रभु शाहले तत्काल एक जना स्वास्थ्यकर्मीलाई तालिमका लागि पठाउने तयारी भइरहेको बताए। यो मेसिन सञ्चालन गर्ने जनशक्ति भए जिल्लावासीले जिल्लाबाहिर जानुपर्ने बाध्यता हट्ने छ।