नापोलीलाई उसकै मैदानमा हराउँदै बार्सिलोना अन्तिम १६ मा

काठमाडौं । युरोपा लिगमा बार्सिलोनाले नापोलीलाई उसकै मैदानमा हराउँदै अन्तिम १६ मा स्थान बनाएको छ। घरेलु मैदानमा १-१ को बराबरी खेलेको बार्सिलोनाले आज बिहान सकिएको खेलमा भने नापोलीलाई ४-२ गोलअन्तरले हराएको हो।

बार्सिलोनाको जितमा चारै जनाले गोल गरे। खेलको ८ मिनेटमै जोर्डी अल्बाले बार्सिलोनालाई अग्रता दिलाएका थिए भने १३ मिनेटमा फ्रांक डियोङले गोल गर्दै २-० को अवस्थामा पुर्‍याएका थिए। त्यस्तै पहिलो हाफको निर्धारित समयको अन्त्यतिर जेरार्ड पिकेले गोल गर्दा बार्सिलोना ३-१ को अवस्थामा थियो।

त्यसअघि पेनाल्टीमार्फत बार्सिलोनाले एक गोल खाएको थियो। तर दोस्रो हाफमा (५९ मिनेटमा) अयुबामियाङले गोल गर्दै बार्सिलोनालाई ४-१ को अवस्थामा लगेका थिए। तर ८७ मिनेटमा पुनः एक गोल खाएपछि बार्सिलोनाले ४-२ को जित निकाल्न सक्यो।

समग्रमा बार्सिलोनाले ५-३ को जित निकाल्न सफल भयो।