अन्तर्राष्ट्रिय मातृभाषा दिवस मनाइँदै

काठमाडौं। अन्तर्राष्ट्रिय मातृभाषा दिवस आज नेपालमा पनि विभिन्न कार्यक्रम गरी मनाइँदै छ। नेपाल प्रज्ञा प्रतिष्ठान, भाषा आयोग, नेपाल आदिवासी जनजाति उत्थान राष्ट्रिय प्रतिष्ठान र भाषिक आन्दोलन गर्दै आएका विभिन्न संघ संस्थाले कार्यक्रम गर्दैछन्। नेपाल प्रज्ञा प्रतिष्ठानले आज मातृभाषाको कविता महोत्सव गर्दैछ।

प्रतिष्ठानको सभाहल कमलादीमा बिहान १० बजेपछि उपराष्ट्रपति नन्दबहादुर पुनको प्रमुख आतिथ्यमा कविता महोत्सवमा हुने प्रतिष्ठानका सदस्य सचिव जगतप्रसाद उपाध्यायले जानकारी दिए। कार्यक्रममा विभिन्न जातजातिका मौलिक झाँकी प्रस्तुत हुनेछ।

महोत्सवमा विभिन्न भाषाका ४६ वटा कविता वाचन हुने सदस्य सचिव उपाध्यायले बताए। दिवसको अवसरमा विश्वभर मातृ भाषाका अधिकार र संरक्षणका विषयमा चर्चा गर्ने गरिन्छ। हरेक वर्ष फेब्रुअरी २१ लाई अन्तर्राष्ट्रिय मातृ भाषा दिवसका रुपमा मनाइँदै आएको छ।

तत्कालीन पूर्वी पाकिस्तान हालको बङ्गलादेशमा बंगाली मातृभाषा बोल्न पाउनुपर्छ भनेर माग गर्दा सन् १९५२ मा त्यहाँका विद्यार्थीहरू मारिएको दिनको संस्मरणमा यो दिवस मनाउन थालिएको हो।

सन् २००० मा संयुक्त राष्ट्रसंघले यस दिनलाई मातृभाषा दिवसका रुपमा मनाउन आह्वान गरेपछि विश्वभर यो दिवस मनाउन थालिएको हो।
बङ्गलादेशमा भने अहिले पनि आजको दिन राष्ट्रिय बिदा दिने गरिन्छ। नेपालमा २०६८ को जनगणना अनुसार १ सय २३ वटा भाषा बोलिन्छन्।