रोहितलाई अब ओडीआई टिमको पनि कप्तानी जिम्मा, कोहलीलाई हटाइयो

काठमाडौं। रोहित शर्मालाई भारतको एकदिवसीय अन्तर्राष्ट्रिय (ओडीआई) टिमको कप्तानीको जिम्मा दिइएको छ। भारतीय क्रिकेट कन्ट्रोल बोर्ड (बिसीसीआई)ले आज विराट कोहलीलाई हटाउँदै रोहित शर्मालाई कप्तान बनाएको हो।

भारत र दक्षिण अफ्रिकाबीच २६ डिसेम्बरदेखि तीन टेष्ट शृंखला हुँदैछ। यसका लागि भारतीय टोलीको घोषणा गरिएको छ। रोहित शर्मा, केएल राहुल, ऋषभ पन्त, जसप्रित बुमराह, मोहम्मद शामी र हनुमा विहारी टोलीमा फर्किएका छन्।

सीमित ओभरको सिरिजका लागि भारतीय टोलीको घोषणा पछि गरिने जनाइएको छ। यस्तै रवीन्द्र जडेजा, शुभमन गिल, अक्षर पटेल र राहुल चाहर भने चोटका कारण छनोटमा परेनन्।

यो भ्रमण २६ डिसेम्बरमा सेन्चुरियनमा हुने टेष्ट खेलबाट शुरु हुनेछ। यसपछि दोस्रो टेस्ट जनवरी ३ देखि ७ सम्म जोहानेसबर्गमा र अन्तिम टेस्ट जनवरी ११ देखि १५ सम्म केप टाउनमा हुनेछ।

अब कोहली भारतीको टेष्ट टिमको मात्र कप्तानमा खुम्च्याइएको छ। यूएई र ओमानमा भएको टी-२० विश्वकपपछि कोहलीले टी-२० टिमको कप्तानी छाडेका घोषणा गरेका थिए। त्यसपछि न्युजिल्याण्डविरुद्ध घरेलु मैदानमा भएको टी-२० सिरिजमा रोहित शर्माले नै भारतको कप्तानी गरेका थिए।