उपाधिको दाबेदार थ्री स्टार सातदोबाटोसँग पराजित

काठमाडौं। उपाधिको प्रवल दाबेदार थ्री स्टार क्लब शहीद स्मारक ‘ए’ डिभिजन लिगमा पराजित भएको छ। थ्री स्टार नवप्रवेशी सातदोबाटो युथ क्लबसँग पराजित भएको छ।

शुक्रबार देखि शुरु लिगको दोस्रो चरणको पहिलो खेलमा नै सातदोबाटोले थ्री स्टारलाई अप्रत्याशित रूपमा १-० गोल अन्तरले पराजित गर्‍यो।
सातदोबाटो गत सिजन ‘बी’ डिभिजन लिग जित्दै पहिलो पटक ‘ए’ डिभिजन खेलिरहेको क्लब हो।

त्रिपुरेश्वरस्थित दशरथ रंगशालामा भएको खेलमा सुदीप गुरुङले खेलको २९ औँ मिनेटमा गरेको गोल नै निर्णायक बन्यो। विदेशी खेलाडी मार्टिन्सको पासमा सुदिपले गरेको लामो प्रहार गोलमा परिणत भएको थियो।

खेलको बाँकी समयमा थ्री स्टारले गोल गर्ने केही मौका खेर फाल्दा खेल सातदोबाटाले जित्यो। जारी लिगमा अपराजित सातदोबाटाले पहिलो खेलमा फ्रेण्ड्स क्लबसँग गोलरहित बराबरी खेलेको थियो। आफ्नो पहिलो खेलमा च्यासललाई ३-० हराएको थ्री स्टारको यो पहिलो हार हो।