ओलीसँग हार्दिक सम्बन्ध भएकाले सचिवमा मै जित्छु : महेश बस्नेत

काठमाडौं। नेकपा एमालेका नेता महेश बस्नेतले पार्टीको दशौं महाधिवेशनमा सचिवमा उम्मेदवारी दिने घोषणा गरेका छन्।

पूर्वमन्त्री समेत रहेका बस्नेतले पार्टीको सचिवमा उम्मेदवारी घोषणा गर्दै पपुलर मत ल्याएर जित्ने दाबी गरे। मंगलबार काठमाडौंस्थित एक कार्यक्रममा बोल्दै उनले अध्यक्ष केपी शर्मा ओलीसँगको हार्दिक सम्बन्ध रहेको र आफै पनि आन्दोलनबाट खारिएर आएको हुनाले सचिवमा आफू विजयी हुने बताए।

पार्टीमा युवाहरूको प्रतिनिधित्वलाई सुनिश्चित गर्न युवाको प्रतिनिधित्व गर्दै सचिवमा उम्मेदवारी दिएको उनको भनाइ थियो। ‘‘समकालीन हिसाबमा फादर अफ दि नेशनको रुपमा युवा र जनताले स्वीकारेकाले ओलीलाई हामी अध्यक्ष बनाउँछौं,” उनले भने, ‘‘उहाँको सशक्त सहयोगीका हिसाबले म यसपालि सचिवको रुपमा दावेदारी प्रस्तुत गरिरहेको छु।”

उनले आफू आन्दोलनबाट खारिएर आएको र अध्यक्ष ओलीसँग राम्रो सम्बन्ध भएकाले निर्वाचनमा पपुलर भोट ल्याएर जित्ने दाबी गरे। ‘‘म आफै यो आन्दोलनबाट खारिएर आएको हुनाले, केपी कमरेडसँगको मेरो एक खालको हार्दिकता भएको हुनाले मलाई देशभरीको एमाले कार्यकर्ताले माया गर्छन,” उनले भने, ‘‘अध्यक्षले मात्रै होइन सबैले माया गर्नुहुन्छ र मलाई लाग्छ निर्वाचन भएमा पपुलर भोट ल्याएर जित्छु।’’

नेता बस्नेतले पार्टीका उपाध्यक्ष भीम रावललाई अध्यक्षमा दिएको उम्मेदवारी फिर्ता लिन आग्रह गरे। रावलले अध्यक्षमा दिएको उम्मेदवारीले राम्रो सन्देश नगएको बताउँदै उनले विगतको भूमिकालाई निरन्तरता दिन उपयुक्त हुने सुझाव दिए। रावलले अध्यक्षमा उम्मेदवारी दिएर आफूलाई अन्य पदमा स्थापित गर्न खोजेको आरोप उनले लगाए।

‘‘उहाँले अध्यक्षमा दावी गरेर राम्रो सन्देश गएन कि भन्ने मलाई लाग्छ। उहाँले पार्टीभित्र विगतदेखि जुन भूमिका खेल्दै आउनु भएको छ, त्यसलाई निरन्तरता दिएर आफूलाई स्थापित गरेर जाने कुरा नै सबभन्दा राम्रो हुन्छ,” उनले भने।

नेता बस्नेतले महाधिवेशनमा पूर्व माओवादी पृष्ठभूमिबाट आएका र दश बूँदे सहमतिको अवधारणा बोकिरहेका नेताहरूलाई सम्मानजनक ढंगले व्यवस्थापन गर्न लागिपर्ने बताए।