जानौँ सामान्य विवाहका फाइदा

काठमाडौं । आजको समयमा विवाह केवल एक सामाजिक परम्परा नभई प्रदर्शनको माध्यम बन्न थालेको छ ।

मानिसहरू ऋण लिएर भएपनि ठूलो तामझामका साथ विवाह गर्न चाहन्छन्, समाजमा देखिनको लागि अनावश्यक खर्च गर्छन् । तर, अब समय परिवर्तन हुँदैछ – धेरै युवा जोडी र तिनीहरूको परिवारले अब सामान्य विवाह रोज्न थालेका छन्, जुन निर्णय बुद्धिमानी र व्यवहारिक दृष्टिले अत्यन्त प्रशंसनीय छ । यस्तो विवाहका फाइदा के-के छन् जानौँ –

फजुल खर्चबाट जोगिइन्छ

सामान्य विवाहले अनावश्यक खर्च नियन्त्रणमा ल्याउँछ । भव्य विवाहमा लुगा, स्थान, सजावट, खानपिन, दाइजो र उपहारमा अत्यधिक खर्च हुन्छ, जसले आर्थिक बोझ थप्छ ।

तर, सरल विवाहमा यस्ता खर्च कटौती गरेर बचत गरिएको पैसालाई घर बनाउने, शिक्षा, लगानी, जग्गा किन्ने वा रमाइलो हनिमुनमा जानको लागि प्रयोग गर्न सकिन्छ ।

मानसिक शान्ति र सन्तोष

थोरै पाहुनाको उपस्थिति, झन्झटरहित वातावरण र नजिकका आफन्तको साथले विवाहलाई अझ आत्मीय बनाउँछ । ठूलो कार्यक्रमको जटिल योजना, व्यवस्थापन र सामाजिक दबाबबाट टाढा रहँदा मानसिक र शारीरिक रूपमा शान्त अनुभव हुन्छ ।

सहज योजना र व्यवस्थापन

सामान्य विवाहको योजना सरल र छिटो बनाउन सकिन्छ । महिनौँ अघिदेखि तयारी गर्नुपर्दैन । केही दिनको योजना र पारिवारिक सहकार्यले नै यो कार्य सफलतापूर्वक सम्पन्न गर्न सकिन्छ ।

वातावरणमैत्री विकल्प

भव्य विवाहले पानी, बिजुली, खाना र प्लास्टिकजन्य सामग्रीको धेरै खर्च हुन्छ । सामान्य विवाहले यस्तो नकारात्मक प्रभाव घटाएर प्रकृतिसँग सन्तुलन मिलाउँछ, जुन दीर्घकालीन दृष्टिकोणमा जिम्मेवार निर्णय हो ।

समाजमा सकारात्मक सन्देश

सामान्य विवाहले समाजमा एक नयाँ सोचको सन्देश दिन्छ – कि विवाह प्रेम, समर्पण र समझदारीको बन्धन हो, विलासिता र प्रदर्शनको होइन । यसले तपाईंको परिपक्वता, मूल्य र सोचाइलाई प्रतिविम्बित गर्छ ।