अवैध अस्पतालमाथि मधेसका मुख्यमन्त्री सिंहको ‘एक्सन’, बन्द गर्न निर्देशन

जनकपुरधाम– मधेस प्रदेशका मुख्यमन्त्री सतिशकुमार सिंहले जनकपुरधामको पिराडीचोकमा अवैध ढङ्गले सञ्चालनमा रहेको मुस्कान अस्पतालमाथि ‘एक्सन’ लिएका छन् । अस्पतालको भ्रमण गरी मुख्यमन्त्री सिंहले उक्त अवैध अस्पताल बन्द गर्न सञ्चालकलाई निर्देशन दिएका हुन् ।

साथै उनले त्यहाँ उपचाररत बिरामीलाई अन्यत्र स्थानान्तरण गर्न तथा वैधता प्राप्त नगरी अस्पताल सञ्चालन नगर्न पनि निर्देशन दिएका छन् ।

अवैध तथा अनधिकृत ढङ्गले सञ्चालनमा रहेको मुस्कान अस्पतालमा बिरामीको उपचारमा गम्भीर हेलचेक्र्याइँ भएको खबर सार्वजनिक भएपछि शुक्रबार राति मुख्यमन्त्री सिंह अस्पताल अनुगमनमा पुगेका थिए । यसपछि उनले अस्पताल सञ्चालकलाई अस्पतालमा उपचार गराइरहेका बिरामीलाई तत्काल व्यवस्थित ढङ्गले विस्तृत विवरणसहित अन्य उपयुक्त अस्पतालमा पठाउन र शनिबार ११ बजेसम्म अस्पतालमा ताल्चा लगाएर सरकारलाई साँचो बुझाउन निर्देशन दिएका हुन् ।

सञ्चालक आफैँले अस्पताल बन्द नगरे सरकारले आफ्नो टोली पठाएर कारबाही गर्ने चेतावनी पनि मुख्यमन्त्री सिंहले दिएका छन् ।

अस्पतालमा तीनजना बिरामी भर्ना भएकाे पाइएकाे थियाे । यसअघि सोही अस्पतालमा पित्तथैलीको शल्यक्रिया गराएकी सर्लाहीको हरिपूर्वा नगरपालिका नगरपालिका वडा नम्बर ५ की २५ वर्षीया बबिताकुमारी यादव अहिलेसम्म बेहोस अवस्थामा रहेको पाइएको छ । हाल उनी जनकपुरधामस्थित जानकी हेल्थकेयर अस्पतालमा उपचाररत छिन् ।

मुख्यमन्त्री सिंहले शुक्रबार साँझ मुस्कान अस्पतालमा पहिलोपटक अनुगमन गरेका थिए । सोबेला सञ्चालकसँग भेट नहुँदा उनी त्यसै फर्किएका थिए । पहिलोपटकको अनुगमनमा जाँदा उनले अस्पतालमा एकजना स्टाफ नर्स र एकजना सीएमएको भरमा अस्पताल सञ्चालन भएको पाएका थिए ।

दोस्रोपटक राति १० बजेर ३० मिनेटमा सो अस्पताल पुगेका मुख्यमन्त्री सिंहले अस्पताल सञ्चालकसँग मापदण्डअनुसार चिकित्सक, स्वास्थ्यकर्मी र भौतिक संरचनाबारे जिज्ञासा राख्दै अस्पताल सञ्चालनका लागि आवश्यक अनुमति एवम् स्वीकृतिसँग सम्बद्ध कागजपत्र अध्ययन गरेका थिए ।

अस्पतालले स्वीकृति नलिएको र जनशक्ति व्यवस्थापन तथा भौतिक संरचना अनुपर्युक्त भएको पाइएपछि उनी एक्सनमा उत्रिएका हुन् । ‘बिरामीलाई तत्काल व्यवस्थित ढङ्गले विस्तृत विवरणसहित अन्य उपयुक्त अस्पतालमा पठाउन र शनिबार ११ बजेसम्म अस्पतालमा ताल्चा लगाएर सरकारलाई साँचो बुझाउन निर्देशन दिएको छु,’ उनले भने ।

सम्बन्धित संस्थाबाट स्वीकृति नलिई सञ्चालनमा रहेका निजी अस्पताललाई मापदण्ड पूरा गर्न मधेश प्रदेश सरकारले पटकपटक ताकेता गर्दासमेत सञ्चालकहरूले अटेर गर्दैआएका छन् ।