सलमानको सुरक्षा बढाइयो, झ्यालमा बुलेट प्रुफ सिसा

काठमाडौं । बलिउड अभिनेता सलमान खानको घरमा बुलेट प्रुफ सिसा लगाइएको छ ।

गत वर्ष अप्रिलमा मुम्बईमा सलमानको ग्यालेक्सी अपार्टमेन्टमा लरेन्स गिरोहसँग सम्बद्ध बदमाशहरूले गोली चलाएको थियो । त्यसपछि सलमानको घरमा सुरक्षा बढाइएको थियो ।

अहिले उनी बस्ने घरको बालकनी र झ्यालमा बुलेट प्रुफ सिसा लगाइएको छ ।

सलमानको ग्यालेक्सी अपार्टमेन्टमा केही समयदेखि जडानको काम चलिरहेको थियो । अहिले अपार्टमेन्टको एउटा भिडिओ सार्वजनिक भएको छ, जसमा उनको बालकनी र झ्यालमा बुलेट प्रुफ सिसा देखिएको छ ।

एनडीटीभीले स्रोतलाई उद्धृत गर्दै सलमानको सुरक्षा प्रणाली उच्च प्रविधियुक्त बनाइएको बताएको छ । घर वरिपरि उच्च रिजोल्युसनका सीसीटीभी क्यामेरा पनि जडान गरिएको छ ।

सलमान ग्यालेक्सी अपार्टमेन्टको भुईं फ्लोरमा १ बीएचकेमा बस्छन् भने उनका आमाबुवा पहिलो तल्लामा बस्छन् ।