यूएसए अन्तर्राष्ट्रिय कराँते च्याम्पियनसिपमा याङटेन लामालाई स्वर्ण

काठमाडौं । याङटेन लामाले यूएसए अन्तर्राष्ट्रिय कराँते च्याम्पियनसिपमा स्वर्णपदक जितेका छन् ।

न्यूओर्कको ब्रुकलिनमा नोभेम्बर १० तारिखमा भएको प्रतियोगिताको पुरुष कुमुते १० देखि ११ वर्ष ब्ल्याक वेल्ट एडभान्स क्याटगोरीमा याङटेनले स्वर्ण जितेको न्यूओर्कस्थित च्याम्पियन्स मार्सल आर्ट्स क्लबले जानकारी दिएको छ । उनले फाइनलमा निक स्पेन्सरलाई पराजित गरेका हुन् ।

याङटेन च्याम्पियन्स मार्सल आर्ट्स क्लबको प्रतिनिधित्व गर्दै प्रतियोगितामा सहभागी भएका हुन् । उनलाई ११औं दक्षिण एसियाली खेलकुद (साग) अन्तर्गत कराँतेका स्वर्ण विजेता सुनिल लामाले प्रशिक्षण दिएका हुन् ।

सुनिल क्लबका सञ्चालक पनि हुन् । नेपालमा पनि च्याम्पियन्स मार्सल आर्ट्स क्लब सञ्चालनमा छ ।