सुदूरपश्चिम रोयल्सले गर्यो रोहन मुस्तफालाई अनुबन्ध

काठमाडौं । सुदूरपश्चिम रोयल्सले यूएईका रोहन मुस्तफालाई टोलीमा अनुबन्ध गरेको छ । सामाजिक सञ्जालमार्फत सुदूरपश्चिमले मुस्तफालाई टोलीमा अनुबन्धको घोषणा गरेको हो ।

रोहनलाई टोलीमा जोड्नु पाउँदा सुदूरपश्चिमले आफ्नो खुसी व्यक्त गरेको छ । ‘नेपाली समर्थकको मनपर्ने खेलाडी तथा नेपाली क्रिकेटमा परिचित अनुहार रोहनको चौतर्फी प्रतिभा र लडाइँको भावनाले उनलाई हाम्रो टोलीको पर्फेक्ट अनुबन्धनको रुपमा लिएको छ, ’ सुदूरपश्चिमले लेखेको छ ।

३६ वर्षीय रोहनलाई विश्वका विभिन्न टी-२० फ्रेन्चाइज लिग खेलेको अनुभव छ । उनले ८१ टी-२० खेलमा १ हजार ३ सय ८४ रन बनाएका छन् ।

रोयल्सले यसअघि न्युजिल्याण्डका बलिङ अलराउन्डर स्कट कुगेलेइन, स्कटल्यान्डका अलराउन्डर ब्रान्डन मक्मलेन र इंग्लिस क्रिकेटर सेफ अलि जेबलाई अनुबन्ध गरिसकेको छ ।

त्यस्तै, अस्ट्रेलियाका पूर्व क्रिकेटर ब्राड हज प्रमुख मेन्टर हुन् । दीपेन्द्र सिंह ऐरी मार्की खेलाडी रहेको रोयल्सको मुख्य प्रशिक्षकमा जगत टमाटा छन् ।