साफ च्याम्पियनसिप : भारतले नेपालविरुद्ध उजुरी दिने

काठमाडौं । भारतीय फुटबल संघ (एआईएफएफ)ले साफ महिला च्याम्पियनसिपको सेमिफाइनलमा नेपालले ७० मिनेट खेल रोकेको भन्दै दक्षिण एसियाली फुटबल महासंघलाई पत्र लेख्ने निर्णय गरेको छ ।

खेल भएको भोलिपल्ट एआईएफएफले साफलाई पत्र लेख्ने निर्णय गरेको हो । खेल रोकिएपछि लामो प्रतिक्षा र पूर्ण भ्रमले आफ्ना खेलाडीको लय र एकाग्रतामा बाधा पुर्‍याएको एआईएफएफले बताएको छ ।

भारतले ६२औं मिनेटमा अग्रता लिएको थियो । लगत्तै नेपालले गोल गर्यो तर, रेफ्रीले गोल अस्वीकार गरेको थियो । त्यसपछि नेपालले रेफ्रीको निर्णयको विरोध गर्दै खेल जारी राख्न अस्वीकार गरेपछि खेल ७० मिनेटभन्दा बढी रोकिएको थियो ।

पर्यवेक्षक अधिकारी र नेपाली टोलीबीचको लामो छलफलपछि खेल पुनः सुरु भएको थियो ।

खेल सुरु भएको केही समयमै नेपालकी सावित्रा भण्डारीको गोल गर्दै बराबरीको स्थितिमा ल्याइन् । त्यसपछि नेपाल टाइब्रेकरमा ४-२ गोलले विजयी भएर फाइनल पुग्यो ।