धोबीखोलामा खसेको ट्याक्सी बाढीले बगायो

काठमाडौं । अनामनगरस्थित मदन भण्डारी कलेज अगाडिको पुलबाट ट्याक्सी खोलामा  खसेको छ । उक्त ट्याक्सीलाई धोबीखोलामा आएको बाढीले बगाएको समाचार प्राप्त भएको छ ।

उक्त ट्याक्सीको नम्बर खुलेको छैन । खोजी कार्य जारी रहेको प्रहरी वृत्त, सिंहदरबारले जनाएको छ । ट्याक्सीमा चालक मात्र रहेको बताइएको छ ।

यसैबीच  काठमाडौंका कपन, पानीपोखरी, सुन्दरीजल, बूढानीलकण्ठ, बबरमहल र आसपासका क्षेत्रमा भारी वर्षा भएको जल तथा मौसम विज्ञान विभागले जनाएको छ ।

पछिल्लो एक घण्टामा उपत्यकामा भारी वर्षा भइरहेको र थप वर्षा हुन सक्ने सम्भावना रहेकाले सतर्क रहन समेत विभागले आग्रह गरेको छ।

विभागले बागमती, धोबीखोला, विष्णुमती नदीमा बहाव बढ्ने सम्भावना रहेकाले नदीको तटीय क्षेत्रमा सोमबार बिहानसम्मै सतर्क रहन आग्रह गरेको छ ।